Վիճակագրական կոմիտեն զավեշտալի ցուցանիշ է հրապարակել՝ կապված աշխատավարձերի հետ. պարզվում է մարտին գործազրկության, հարկադիր պարապուրդի պայմաններում միջին անվանական աշխատավարձը աճել է նախորդ տարվա նույն ժամանակահատվածի համեմատ։ Այս մասին NEWS.am–ի հետ զրույցում ասաց ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը՝ անդրադառնալով ՀՀ վիճակագրական կոմիտեի հրապարակած՝ 2020 թվականի հունվար-մարտ ամիսների սոցիալ-տնտեսական ցուցանիշներին։
«Կառավարության՝ կորոնավիրուսի հետևանքների հաղթահարման մի շարք ծրագրեր նախատեսված են մարտ ամսվա ընթացքում աշխատանք կորցրած և հարկադիր պարապուրդի մեջ գտնվող աշխատողների աջակցությանը, հայտարարվում է, որ հազարավոր մարդիկ են օգտվել այդ ծրագրերից, բայց արի ու տես՝ հակառակ կառավարության ծրագրերի հիմնավորումների, վիճակագրական կոմիտեն հայտարարում է, որ այս տարվա մարտին միջին ամսական անվանական աշխատավարձը աճել է 8,6 տոկոսով, պետական հատվածում՝ 9,4 տոկոս, իսկ մասնավորում՝ 7,2 տոկոսով, ինչը ենթադրում է, որ մենք նախորդ տարվա մարտի համեմատ ավելի լավ ենք ապրել»,–ասաց նա՝ հույս հայտնելով, որ պաշտոնատար անձինք և քաղաքական մեծամասնության ներկայացուցիչները կբացատրեն, թե ինչպե՞ս է գործազրկության, հարկադիր պարապուրդի պայմաններում մարտին միջին անվանական ամսական աշխատավարձը աճել նախորդ տարվա նույն ժամանակահատվածի համեմատ։
Տնտեսագետի համար կանխատեսելի էր, որ այս տարվա մարտ ամսվա ցուցանիշները անկումային կլինեն՝ հաշվի առնելով, որ նոր տեսակի կորոնավիրուսի բռնկմամբ պայմանավորված մարտի 16-ից Հայաստանում հայտարարվել է արտակարգ դրություն և մարդկանց տեղաշարժը, տնտեսական գործունեության գրեթե բոլոր տեսականները արգելվել են։
«Կարանտինի նպատակն էր կանխել վարակի հետագա տարածումը, սահմանափակել մարդկանց շփումը, մինչդեռ ոչ միայն չհաջողվեց ապահովել և վերահսկել կարանտինային վիճակը, այլև տնտեսությանը մեծ վնաս հասցվեց»,–ասաց նա։
Անդրադառնալով մարտ ամսվա տնտեսական ցուցանիշներին, Սուրեն Պարսյանը նշեց, որ դրանք կանխատեսածից ավելի բարձր են և պայմանավորված են առաջին եռամսյակում գյուղատնտեսության ոլորտի աննախադեպ՝ 4,5 տոկոս աճով, որը տնտեսագետի բնորոշմամբ՝ խիստ կասկածելի ցուցանիշ է նկատի ունենալով այն, որ 2019 թվականին այս ոլորտում գրանցվել էր մոտ 4 տոկոս անկում, ինչպես նաև կտրուկ նվազել էր գյուղոլորտի վարկերի ծավալը:
Նշենք, որ այս տարվա հունվար-մարտ ամիսներին տնտեսական ակտիվությունը աճել է 4 տոկոսով։
Սուրեն Պարսյանի խոսքով՝ աճի դինամիկան կտրուկ նվազել է, ինչը պայմանավորված է շինարարության, առևտրի և ծառայության ոլորտների կտրուկ անկմամբ։
