Ապրիլի 28-ին ժամը 17:30-17:40-ի սահմաններում Գավառի Ազատության փողոցում տեղի է ունեցել հրաձգություն մի քանի մեքենաներով անձանց միջև, ինչի հետևանքով ունեցել ենք երկու մահ ու վիրավորներ: Վիրավորները տեղափոխվել են Գավառի հիվանդանոց: Այստեղ հավաքվել են մեծաթիվ հարազատներ, ընկերներ, ովքեր ավելի ուշ ուժ գործադրելով ոստիկանության ու բուժաշխատակազմի նկատմամբ, կոտրելով դռներն ու պատուհանները, ներս են մտել և վնասել ևս երկու վիրավորների, ովքեր այդ հրաձգության մասնակից են եղել: Այս մասին Ազատության հետ զրույցում հայտարարել է Գեղարքունիքի մարզպետ Գնել Սանոսյանը:
Մարզպետի տեղեկություններով, առաջին բախման ժամանակ երկու կողմերում էլ կան և՛ Գավառի բնակիչներ, և՛ Նորատուսի բնակիչներ. «Մահացածներից մեկը Գավառի բնակիչ է, մյուսը՝ Նորատուսի»:
Սանոսյանի խոսքերով, փոխհրաձգությունից հետո վիրավորներին տեղափոխել են հիվանդանոց, ինչից հետո նրանց հարազատները սկսել են հավաքվել հիվանդանոցի մոտ:
Հարցին, թե ինչպես է հաջողվել 500 հոգու տեղաշարժվել քաղաքում, ինչպես նրանց չեն նկատել, մարզպետը նշել է, որ հիվանդանոցում ներկա չի եղել, սակայն ներկաները նույնիսկ 500-ից շատ մարդկանց մասին են խոսում. «Արդյո՞ք նրանց ձեռքին ձողեր, զենք եղել են, չեմ կարող հաստատել: Հիվանդանոցը տեսահսկվում է, ոստիկանությունը կաշխատի, ամբողջ պատկերը կունենանք: Քաղաքացիների թիվը մի քանի անգամ գերազանցել է ոստիկանության թվին, միաժամանակ դռներն ու պատուհանները կոտրել ու ներս են մտել, իրավիճակը դարձել է անվերահսկելի»։
Սանոսյանը հավելեց. ՛՛Ընդհանուր 5 վիրավոր ունենք, բոլորն առաջին բուժօգնություն ստանալուց հետո տեղափոխվել են Երևան: Այս պահին Գավառի հիվանդանոցում այդ դեպքի վիրավորներից որևէ մեկը չկա՛՛:
Մարզպետի խոսքերով, ոստիկանությունն այս պահին վերահսկում է իրավիճակը, այն կայուն է:
Հարցին, թե որտեղ է եղել ոստիկանապետը, Սանոսյանն ասաց, որ վերջինիս հետ միասին եղել են դեպքի վայրում, երբ հիվանդանոցում տեղի է ունեցել միջադեպը: Դա տեղի է ունեցել 20:00-ից հետո:
Մարզպետը նշել է, թե մտահոգություն կա, որ կողմերի միջև կրկին բախումներ կլինեն. «Բայց մյուս կողմից ոստիկանությունը, հասկանալով դա, բավական մեծ ուժերով աշխատանք է տանում: Իրավիճակը կայուն է»:
Մարզպետն ասել է, որ մեծ թվով ձերբակալվածներ կան, թվի մասին ինֆորմացիա չունի. «Գործընթացը երկու դեպքերի մասով էլ շարունակվում է»:
՛՛Հետագայում քննությունը կպարզի ամբողջ եղելությունը, սակայն բնակչության շրջանում խոսակցություններ կան, որ որոշակի ժամանակ առաջ երիտասարդների միջև ինչ-որ վեճ է եղել, որը վերաճել է հրաձգության՝ արդեն մեծահասակների միջև՛՛,-ասել է մարզպետը:
Սանոսյանի խոսքերով, անհասկանալի է, թե ինչու է երիտասարդների վեճը վերածվել նման միջադեպի, սակայն կա այն, ինչ կա:
Մարզպետի խոսքերով, ոստիկանությունը շատ օպերատիվ է աշխատել, ամբողջ խնդիրը եղել է հիվանդանոցում հավաքվածների թիվը, որը շատ մեծ է եղել. «Այդ ժամանակ նրանց տրամադրվածությունը, հոգեբանական վիճակն այնպիսին է եղել, որ նման արարք են թույլ տվել»:
Հիվանդանոցում գտնվող վիրավորները եղել են երկու կողմերից: