«Ինչ ես ուզում ինձանից, դու հետևում ես, հիմա ինչ կուզես ինձանից, իմ կարծիքը քեզ պետք չի, ըտենց բաներն ուրիշներին հարցրու»,-պատասխանելով ArmDaily.am-ի այն հարցին, թե արդյոք հետևում է Գավառ քաղաքում տեղի ունեցած դեպքերին և ինչպես է գնահատում ոստիկանության աշխատանքը, ասաց «Բարգավաճ Հայաստան» խմբակցության պատգամավոր Վարդան Ղուկասյանը:
Դիտարկմանը` թե ինքը պաշտոնյա է և պետք է հետաքրքրվի, թե ինչ է կատարվում երկրում, Ղուկասյանը նշեց. «Հեռախոսիս համարը վերցրել ես, զանգում եք Գավառից հարցեր ես տալիս հա՞: Էդ քանի տարեկան խելքովդ. Էդ քո ուսուցչին ասա, որ կտանեմ հետս, ճանապարհին կկորցնեմ, դու էդ հարցերն ինձ ինչի ես տալիս, համապատասխան մարդկանց գնա տուր: Պատգամավոր եմ, դա ինչ կապ ունի, հլը սրա խելքին նայի, մյուս անգամ զանգ չտաս»։
Այս խոսքերից հետո Ղուկասյանն անմիջապես անջատեց հեռախոսը՝ չլսելով մեր մյուս հարցերը։
Իսկ մենք ցանկանում էինք նրան հարցնել, որ այսօր շատերը Գավառի դեպքերը համեմատում են Գյումրիում տարիներ ի վեր կատարվող հանցագործությունների, հաշվեհարդարների հետ, որոնց մասնակիցները հաճախ ուղղակի կամ անուղղակի կապ են ունեցել իր հետ, ինչն է նման միջադեպների պատճառը, աստվածավախ պատգամավորը, ով ամենեւիեն էլ կրիմինալի հետ որեւէ կապ չունի, ինչպես է պատրաստվում պայքարել հասարակության մեջ արմատացած քրեական ենթամշակույթի դեմ։
Իհարկե, հետաքրքիր կլիներ նաեւ օրենսդրի ներկայացուցչի տեսակետը իմանալ երեկ երկրի թիվ մեկ ամբիոնում ծավալված «նոր որակի» քաղաքական բանավեճի մասին, ինչ են հրամցնում պատգամավորները հանրությանը եւ ինչ կարող են ակնկալել, բայց Վարդան Ղուկասյանը չէր ցանկանում այդ հարցերին անդրադառնալ՝ համարելով, որ դա իր գործը չէ։