Թեև եկեղեցականները մեղադրում են տրանսգենդերներին իրենց «սխալ» հայացքների համար, Պապի աջակցությունը նրանց շարունակվում է։
Անակնկալ քայլով Ֆրանցիսկոս Պապը նախորդ շաբաթ ֆինանսական աջակցություն ցուցաբերեց մի խումբ տրանսգենդեր սեքս-աշխատողների՝ այսպիսով մեղմելով ԼԳԲՏ համայնքի նկատմամբ Կաթոլիկ եկեղեցու վաղեմի թշնամանքը։
Վերջին շրջանում Իտալիան մեծ վնասներ է կրում համավարակի հետևանքով, իսկ սեքս-աշխատողները հանդիպում են ավելի մեծ դժվարությունների, քանի որ համապատասխան փաստաթղթերի բացակայության արդյունքում չեն կարողանում օգտվել աշխատողներին տրամադրվող աջակցության որոշ ձևերից։
Ապրիլ ամսվա կեսերին ծայրահեղ աղքատության առջև կանգնած մի խումբ տրանսսեքսուալ աշխատողներ, օգնություն են խնդրել Տորվայանիկայի եկեղեցու սուրբ կույսից։ Թեև եկեղեցու պաշտոնյա հայր Էնդրյու Քոնոկչիան նրանց տրամադրել է որոշ սնունդ և պարագաներ, սակայն նրանք նաև գումարի կարիք ունեին՝ իրենց բնակարանային և բժշկական ծախսերը հոգալու համար։ 20 հոգուց բաղկացած այդ խմբում հիմնականում կանայք էին՝ եկած Լատինական Ամերիկայից։ Ոմանք ՄԻԱՎ վարակակիրներ էին։
Օրերը անցնում էին և ոչ մի այլ գործակալություն կամ կազմակերպություն չէր օգնում սեքս-աշխատողներին, իսկ Քոնոչիան չէր կարողանում բավարար ռեսուրսներ հավաքել նրանց օգնելու համար: Նա օգնության համար դիմում է Վատիկան, և այս շաբաթ Հռոմի Ֆրանցիսկոս Պապը գումար է նվիրաբերում նրանց «Պապական ողորմության» միջոցով։ Հայտարարության մեջ ոչինչ չի նշվում գումարի չափի և հետագա նվիրատվությունների մասին։
Պապի օգնական կարդինալ Կոնրադ Կրաևսկին ասել է, որ իրենք չունեին ռեսուրսներ և չէին կարող դիմել նաև կառավարությանը կամ որևէ քաղաքական գործչի։ Նրանք դիմել են հոգևոր հովվին և վերջինս օգնել է իրենց։
Աջակցությանն ի պատասխան՝ աշխատողների խումբը Պապին շնորհակալական ձայնային հաղորդագրություն է ուղարկել։ Անդրադառնալով հաղորդագրությանը՝ կրոնական նորությունների ծառայությունը հրապարակել է որոշ հատվածներ՝ «շատ շնորհակալ ենք, Պապ Ֆրանցիսկոս», «Աստված օրհնի Ձեզ» և «թող կույսը պաշտպանի Ձեզ»:
«Կարծում եմ՝ մենք այդ մարդկանց հետ վարվում ենք այնպես, կարծես նրանք անտեսանելի լինեն», — ասել է Քոնոչիան: «Սա ինչպես առողջական, այնպես էլ սոցիալական արտակարգ իրավիճակ է»:
Եկեղեցու պաշտոնյաները նշում են, որ մաֆիան գողացել է կանանցից շատերի անձնագրերը՝ ստիպելով նրանց զբաղվել սեռական բնույթի աշխատանքով և յուրացրել նրանց գումարները: Ըստ եկեղեցու պաշտոնյաների, կաթոլիկ եկեղեցու օգնությունը նրանց «բնական» է։
Սակայն դա որոշ չափով հակասում է Վատիկանի տրանսֆոբիկ հռետորաբանությանը: Անցյալ տարի Հռոմի Պապ Ֆրանցիսկոսը և Վատիկանը հանդես էին եկել՝ «Նա ստեղծեց տղամարդ և կին։ Կրթության ոլորտում գենդերային տեսության հարցի շուրջ երկխոսության ճանապարհին» անվանմամբ հուշագրով, որտեղ նրանք քննադատում էին բոլոր այն մարդկանց, ովքեր փոխել են իրենց սեռը։
Կարդինալ Ջուզեպպե Վերսալդիի կողմից գրված այս փաստաթուղթը հակադրվում էր «անձի՝ իր սեռը ընտրելու իրավունքի հասարակական ճանաչմանը և նոր տեսակի միություններին, որոնք ուղղակիորեն հակասում էին ամուսնության՝ որպես տղամարդու և կնոջ միության մոդելին»։
Անդրադառնալով բազմասեռականներին՝ հուշագրում նաև նշվում է՝ «ոչ այլ ինչ, քան ազատության խառնաշփոթ գաղափար` զգացմունքների և ցանկությունների հարթությունում»։
Հայտնի չէ, թե որքան գումար է նվիրաբերվել կամ որքան գումար ունի Կաթոլիկ եկեղեցին, քանի որ թվերը հրապարակելը պարտադիր չէ։ Աղմկահարույց Վատիկանի բանկը, որտեղ գտնվում են եկեղեցու պաշտոնյաների գումարները, 2015 թվականին 8 միլիարդ դոլարի ակտիվ է ներկայացրել։ Սակայն եկեղեցին վերջերս զգալի ֆինանսական վնասներ է կրել իր բազմամիլիոնանոց բենզալցակայանի ցանցի կրած վնասների հետևանքով