Գավառում տեղի ունեցած կրակոցների հետեւանքով վիրավորում ստացած՝ Նորատուսի բնակիչ Սասուն Մելոյանը զրկված է հարազատներին տեսակցելու հնարավորությունից, չի կարող իր մոտ ունենալ հեռախոս, մինչեւ երեկ զրկած է եղել նաեւ փաստաբանների այցելությունից։ Այդ մասին NEWS.am-ի հետ զրույցում ասաց նրա փաստաբան Հովսեփ Սարգսյանը։
«Երեկ չէին թույլատրում մեզ՝ փաստաբաններիս տեսակցել մեր պաշտպանյալին, ՄԻՊ-ի միջամտությամբ, ինչպես նաեւ նաեւ մեր համառության շնորհիվ կարողացանք տեսակցել նրան։ Մենք անընդհատ խոսում ենք մարդու իրավունքներից, Եվրոպական իրավունքների կոնվենցիայից ենք խոսում։ Անգամ կալանավորն այդպիսի պայմաններում չի պահվում։ Անգամ հեռախոս չկա, հարազատների այցելությունը արգելված է, իսկ իմ պաշտպանյալը վկայի կարգավիճակ ունի»,- ասաց պաշտպանը։
Հովսեփ Սարգսյանը հայտնեց, որ իր պաշտպանյալը կրակոցների ժամանակ ստացել է հրազենային վնասվածք՝ ոտքի հատվածում։
«Ապրիլի 30-ին, մայիսի 1-ին որեւէ խոչընդոտ չի եղել, չգիտես՝ ինչու քննիչը կամայականորեն որոշեց, որ տեսակցությունները պետք է արգելի։ Ավտանգությունն ումի՞ց են ապահովում՝ կնոջի՞ց, թե՞ փաստաբանից։ Վերջիվերջո, հիվանդանոցում իրենց հարազատն է պառկած, ուզում են իրենց հարազատին տեսնել»,- ասաց պաշտպանը։
Պաշտպանն ասաց, որ իր պաշտպանյալի նկատմամբ որեւէ խափանման միջոց չի կիրառվել։
Սարգսյանը հայտնեց, որ պատրաստվում են քննչական մարմին դիմել, որ հարազատները վաղվանից սկսեն այցելել իր պաշտպանյալին. «Եթե չբավարարեն, երեւի հանցագործության մասին հաղորդում կտամ»։
Հովսեփ Սարգսյանն ասաց, որ իր պաշտպանյալն այդ դեպքին մասնակից չի եղել, տեսել է համագյուղացիների ավտոմեքենան կանգնել է. «Ինքն իջնում է մեքենայից, այդ պահին ոտքին կրակոց է լինում, ու ինքը հեռանում է դեպքի վայրից»։
Հիշեցնենք, որ ապրիլի 28-ին Գեղարքունիքի մարզի Գավառ համայնքի Ազատության փողոցում կրակոցներ էին հնչել, որոնց հետեւանքով մահացել էր 2 մարդ, եւս 4-ը մարմնական վնասվածք էր ստացել։