ՊԵԿ նախկին նախագահ Գագիկ Խաչատրյանի որդին, «Յուքոմ» ընկերության սեփականատեր Գուրգեն Խաչատրյանը, որին ներկայացված մեղադրանքը վերջերս լրացվել էր, արդեն հասցրել է թաքնվել քննությունից՝ միգուցե նաև՝ փախչել Հայաստանից: Ընդ որում, դեռ երեկ դատարանի որոշումից հետո Գուրգեն խաչատրյանն այդ մասին հայտարարել էր՝ ասելով, որ «նպատակահարմար չի գտնում կալանավորի կարգավիճակ ձեռք բերել»:
NewArmenia.am-ի հետ զրույցում քաղաքագետ, ՀՀ հանրային խորհրդի նախագահ Ստյոպա Սաֆարյանը կատարվածը «բարդակ» որակեց: «Գագիկ Խաչատրյանի տղայի կալանքի հիմքերը սահմանելիս, երբ դիմում էին դատարան, արդեն պիտի հասկանային, որ էդ մարդը հսկողության տակ պիտի լինի: Ո՞նց էին պատկերացնում, հրավիրատո՞մս պիտի ուղարկեին որոշումից հետո, որ ինքը ներկայանար»,-տարակուսանք հայտնեց Սաֆարյանը՝ հավելելով. «Նա էլ ակնհայտորեն պատահական մեկը չէ, իր փաստաբաններով տեղեկացված է եղել, որ դատարանում իր խափանման միջոցի հարցն է քննվում: Ու էսպիսի բարդա՞կ, սա ուղղակի անպատկերացնելի է: Այն էլ մի երկրում, որը կորոնավիրուսով պայմանավորված արտակարգ դրության մեջ է, հեռախոսներով գեոլոկացիաների պարզման օրենք ընդունեցին, որ պարզեն՝ մարդիկ որտեղ են: Չգիտեմ, սա ուղեղում դժվար տեղավորվող բան է»:
Մեր հարցին, թե կատարվածը կարելի՞ է իրավապահ համակարգի սաբոտաժ անվանել, քաղաքագետը պատասխանեց. «Կարծում եմ, ներկա իրավապահ համակարգում կան ինֆորմացիա տրամադրողներին նախկին ռեժիմի օդիոզ դեմքերին՝ նրանց ունեցվածքի, գույքի, հանցագործությունների հետ կապված և դա հաջող են անում»:
Հետաքրքրվեցինք նաև, թե ինչպե՞ս է գնահատում, որ իշխանությունը չի կարողանում նրանց բացահայտել, հանել աշխատանքից կամ պատասխանավության ենթարկել: «Պետք է ծառայողական քննություններ նշանակվեն, պատիժներ լինեն: Պիտի պատժվի նա, ով իր պարտականությունները չի կարողանում կատարել, պիտի հանվեն աշխատանքից: Համենայն դեպս, այն քննչական մարմինը՝ ԱԱԾ-ն, որը ներկայացրել է խափանման միջոցը փոխելու միջնորդությունը, պարտավոր էր մտածել նրա փախուստը բացառելու միջոցներ ձեռնարկելու մասին: Ենթադրենք՝ Միքայել Մինասյանը փախուստի էր դիմել Վանեցյանի օգնությամբ, որոնց կապն ակնհայտ է, բայց հիմա դասեր չե՞նք քաղում»,-նշեց Սաֆարյանը:
Նրա խոսքով՝ մինչև ԱԱԾ-ն, ոստիկանությունը, դատաիրավական համակարգը արմատական փոփոխությունների չենթարկվեն, այդպիսի միջադեպեր լինելու են: Սաֆարյանը համաձայն է, որ սա ապտակ է մեր իրավապահ համարագին: «Չեմ ասում՝ կոնտր հեղափոխություն արեցին, բայց ապտակ հասցրեցին»:
Նշենք, որ Գուրգեն Խաչատրյանը մեղադրվում է «Մուլտի կոնցեռնի» տնօրենի կողմից ՊԵԿ նախկին նախագահին՝ իր հորը, 22.4 մլն դոլար կաշառք տալուն օժանդակելու մեջ: