Farell զուգագուլպաների համաշխարհային բրենդի հիմնադիր Գոռ Հարոյանը օրերս իր Ինստագրամյան էջում տեսանյութ է հրապարակել, որտեղ երևում է, թե ինչպես է Գյումրիում իրեն մոտենալ փորձող մուրացիկ տարեց կնոջը մեկն ուժեղ ապտակում, իսկ ինքը՝ զուգագուլպաների համաշխարհային մոդելյերը այդ ամենը տեսանկարահանող ընկերոջ հետ հրճվում է տեսարանով ու բարձրաձայն ծիծաղում՝ հարվածողին սաստելու փոխարեն:
Ավելին, կատարվածը այնքան է դուր եկել համաշխարհային մոդելյերին, որ նա այդ տեսանյութը հրապարակել է Ինստագրամի իր էջում:
Ոստիկանության լրատվական բաժնից անպատասխան թողեցին մեր հարցը, թե տեսանյութը ու դրանում կատարված բռնությունը տարեց կնոջ նկատմամբ քննության առարկա դարձե՞լ է, թե՞ ոչ:
Նշենք, որ Գոռ Հարոյանը գյումրեցի է, տևական ժամանակ Ֆրանսիայում է ապրում, որտեղ էլ սովորել է իր մասնագիտությունը ու հիմնել բրենդը:
Խնդրին ֆեյսբուքում անդրադարձել է ԲՀԿ-ական Աշոտ Արզումանյանը. «Պատահմամբ ինստագրամում տեսա այն, ինչն իրոք հանգիստ չի տալիս ինձ։ Լկտիության և անպատժելիության մթնոլորտը հասել է իր գագաթնակետին։ Ինչը կտեսնեք ստորև տեղադրված տեսահոլովակում, խոստանում եմ, որ անպատիժ չի մնալու։ Անելու եմ հնարավոր և անհնարին ամեն ինչ, որ և՛ տեսահոլովակ հրապարակողը, և՛ անօգնական տատիկին հարվածողը պատժվեն օրենքի ողջ խստությամբ»,-գրել է Արզումանյանը՝ հրապարակայնորեն դիմելով Մարդու Իրավունքների պաշտպանին և ակնկալելով հրատապ և սպառիչ լուծում։
ՄԻՊ լրատվական ծառայությունն արձագանքել է հետևյալ կերպ. «Մարդու արժանապատվությունն իր իրավունքների հիմքում է, և որևէ պարագայում, առավել ևս հոգեկան առողջության խնդիրներ ունեցող անձանց, ծաղրելն անթույլատրելի է: Նման երևույթները պետք է բացառվեն մեր հասարակությունում»:
ՀՀ մարդու իրավունքների պաշտպանի աշխատակազմի հանրային կապերի բաժինը, սակայն, որևէ տեղեկություն չի հրապարակել, թե արդյոք դիմելու են իրավապահներին, թե ոչ: