Նիկոլ Փաշինյանն այսօր ԱԺ ամբիոնից ելույթ ունեցավ՝ դատապարտելով խորհրդարանի դահլիճում այսօր առավոտյան տեղի ունեցած միջադեպը, որ իր համար անընդունելի է բռնության ցանկացած երևույթ՝ իր դրսևորումներով: Ելույթի կեսից, սակայն, Փաշինյանի դատապարտող ելույթը վերածվեց մեղադրական ելույթի: Նա որոշեց, որ նախկիններն են մեղավոր այս ամենում, ու խորհրարանում կան նրանց սպասարկող ուժեր: Ըստ Փաշինյանի՝ բռնությունը միայն ֆիզիկական չէ, բռնությունը լինում է նաև բարոյական և հոգեբանական, և արդեն երկու տարի է՝ հեղափոխական թիմը, այդ թվում՝ այս խորհրդարանական մեծամասնությունն ու կառավարությունը հետևողականորեն և շարունակաբար ենթարկվում են բարոյական և հոգեբանական բռնությունների:
«Ներողություն եմ խնդրում ասելու համար, բայց խորհրդարանական մեծամասնության կին պատգամավորներին սոցիալական ցանցերում սպառնում են բռնաբարել, նրանց երեխաներին սպառնում են փողոցներում սատկացնել, ամենավերջին ստահոդ, քստմնելի տեղեկություններն են տարածում ԱԺ «Իմ քայլը» խմբակցությունը ներկայացնող պատգամավորների վերաբերյալ: Եվ այս ամենը ունի մեկ նպատակ՝ խեղճացնել քաղաքական մեծամասնությանը, քայքայել քաղաքական մեծամասնությունը և քայքայել ժողովրդի և այդ մեծամասնության միջև առկա վստահությունը»,-ասաց Նիկոլ Փաշինյանը:
Ապա նա պատմեց, որ երեկ ինքն ընդունել է սուրճ խմելու վերաբերյալ Էդմոն Մարուքյանի արած հրավերը, իջել է նրա աշխատասենյակ, որը նախկինում իրենն էր, և Մարուքյանին ուղիղ ասել է, որ իրենք՝ բոլորը, ունեն հիմքեր՝ կասկածելու, որ Մարուքյանն ու իր գործունեությունն այդ ողջ հոգեբանական և բարոյական բռնությունները և, ի վերջո, ֆիզիկական բռնություններ գործարկելու պլանի մի անբաժանելի մասն է:
Հետո ասաց, որ ինքը, դիտելով միջադեպի տեսագրությունը, իրեն մի պարզ հարց է տալիս.
«Միջադեպը, որը դատապարտելի է, տեղի է ունեցել այ էնտեղ: Հարց՝ իսկ ի՞նչ գործ ուներ ելույթ ունեցողը այնտեղ կանգնած։ Եվ երբ որ ամբիոնից իջնում էր և մեծ արագությամբ ընթանում էր դեպի պատգամավոր Սասուն Միքայելյանը, ինչի՞ համար էր գնում՝ քաղաքական երկխոսություն ծավալելո՞ւ: Կամ որտեղի՞ց վստահությունը, եթե նույնիսկ Սասուն Միքայելյանը տեղից վեր էր կացել, եթե նույնիսկ շարժվել էր, որտեղի՞ց վստահությունը, որ նա ուղղակի վրդովմունքն իր ձևով արտահայտելով՝ դուրս չէր գալու այս դահլիիճից: Տեղի ուենցածը այլ կերպ, քան քստմնելի սադրանք, ես չեմ կարող անվանել, մանավանդ այդ տեսագրությունը մի քանի անգամ նայելուց հետո»,-ասաց Փաշինյանը՝ դատապարտելով իրենց, որ իրենք տրվում են սադրանքների:
Ըստ Նիկոլ Փաշինյանի՝ իրենց անընդհատ, ամեն օր ուզում են շեղել իրենց արժեքներից, և որ այս ամբիոնից էր այդ նույն մարդը` Էդմոն Մարուքյանն ասում, թե «մեզ պադյեզդներում ծեծելո՞ւ եք»:
«Նրանք մեզ ուզում են դարձնել իրենց պադյեզդներում ծեծողներ, նրանք մեզ ուզում են հավասարեցնել քիլլերների, նրանք մեզ ուզում են շեղել մեր արժեքներից, նրանք մեզ ուզում են հանել հավասարակշռությունից»,-ասաց Փաշինյանը՝ իրենց արդեն զոհի տեղ ներկայացնելով, թե իբրև այսօր իշխանությունն ամեն օր դառնում է բռնության զոհ:
«Այսօր իշխանությունն ամեն օր դառնում է բռնության զոհ սերժական, քոչարյանական հանցավոր բանդայի և նրանց խորհրդարանական սպասարկուների կողմից»,-ասաց Փաշինյանը՝ ձեռքով ցույց տալով «Լուսավոր Հայաստան» խմբակցության հատվածը, որն արդեն դատարկ էր:
Նորից դատապարտելով տեղի ունեցածը՝ Նիկոլ Փաշինյանն ասաց, որ սա համարում է իրենց և անձամբ իր ամենամեծ պարտությունը, որ իրենք ունեցել են հեղափոխությունից հետո: Բայց սա թող որևէ մեին թող հուսավառ չանի, ասաց նա ու սկսեց արտասանել հեղափոխության համար գրած իր բանաստեծղությունից մի հատված. «Ես պարտվել եմ, պարտվել եմ քանիցս, ու տեսել քմծիծաղը ստի, էսօր էլ ենք մենք ետսնում քմծիծաղը ստի, բայց իմ կամքն ամուր է քարից էլ, իմ ոգին հանձնվել չգիտի: Այո, էս ամեն ինչը կապ ունի ապօրինի գույքի բռնագանձման ամսին օրենքի հետ, էս ամեն ինչը կապ ուինի բազմապիսի քրեական գործերի հետ»:
Այնուհետև բռնությունն ու «պադյեզդներում մարդ ծեծելու» մշակույթը դատապարտող Նիկոլ Փաշինյանը որոշեց, այդուհանդերձ, սպառնալ, որ իրենք, այո, պադյեզդներում կծեծեն և կփռեն ասֆալտին:
«Այսօր բռնության է ենթարկվում ոչ միայն իշխող մեծամասնությունը, այսօր հոգեբանական բռնության է ենթարկվում հանրությունը, որովհետև նրանք մեզ ուզում են դնել ընտրության առաջ՝ կա՛մ մենք պետք է դառնանք պադյեզդներում ծեծողներ, կա՛մ մեր թիմակիցները պետք է վախենան պադյեզդներ մտնելուց: Թույլ չենք տա, այո, էդ պադյեզդներում ձեզ ասֆալտներին կպառկացնենք: Դուք չունեք հնարավորություն ՀՀ ժողովրդից վերցնել այն իշխանությունը, որը պատկանում է ժողովրդին»,-սպառնաց Նիկոլ Փաշինյանը: