Խորհրդարանում կիրառված բռնությունից հետո ես իմ ելույթում նշեցի, որ տեղի ունեցածը առաջին հերթին քաղաքական է, և մենք ակնկալում եմ քաղաքական գնահատականներ ու հետևանքներ: Դրանից հետո վարչապետն իր ելույթով լեգիտիմացրեց խորհրդարանում տեղի ունեցած բռնությունը և սկսեց մի արշավ, որը միտված է բռնության զոհին դարձնել հիմնական մեղավոր: Այս մասին ԱԺ ճեպազրույցների ընթացքում հայտարարեց «Լուսավոր Հայաստան» խմբակցության ղեկավար Էդմոն Մարուքյանը՝ նշելով, թե մեկնարկած արշավն այսօր էլ մեծ թափով շարունակվում է:
Նրա խոսքով՝ խորհրդարանում հնչած ընդդիմադիր, այլընտրանքային, քննադատական սուր խոսքը որակվեց որպես սադրանք, ապա ասվեց, թե այդ ժամանակ կարելի է բռնություն կիրառել ու այն արդարացնել:
«Դա ազդելու է ՀՀ-ում ընթացող բոլոր գործընթացների, խոսքի ազատության վրա: Սա մի մեծ գործընթացի սկիզբ է, որով իշխանությունը դրեց իր վերջի սկիզբը, որովհետև այն իշխանությունը, որը ԱԺ-ում ազատ խոսքի դեմ բռնությունը արդարացնում է, չի կարող լավ ապագա ունենալ»,-ասաց նա ՝ նշելով, թե իշխանության կողմից ամեն ինչ արվելու է՝ ժողովրդին մանիպուլացնելու համար, որ ինչ-որ կերպ «մարսվի» ընդդիմադիր խմբակցության նկատմամբ խուլիգանական հարձակումը, ինչը որևէ պարագայում թույլ չեն տալու:
Նա նշեց նաև, որ իրեն ուղղված մեղադրանքներ է տեսել ազատամարտիկների կողմից, որոնք այժմ Սասուն Միքայելյանի կողքին են, մինչդեռ 2008-2009 թթ. եղել են Մանվել Գրիգորյանի հետ:
Հարցին՝ ի վերջո ինչպիսի՞ն են «Լուսավոր Հայաստան»-ի և անձամբ Էդմոն Մարուքյանի հարաբերությունները նախկին իշխանությունների հետ, Մարուքյանը պատասխանեց, թե այլևս երբեք «Լուսավոր Հայաստան»-ի որևէ ներկայացուցիչ չի պատասխանելու «նախկինների» վերաբերյալ որևէ հարցի, որովհետև այս օրերին իրենք սպասել են իշխանության կողմից արված հայտարարությունների հիմնավորումներ, որոնք չեղան:
Ինչ վերաբերում է իշխանությւոնների այն դիտարկումներին, որ «Լուսավոր Հայաստան»-ի՝ «նախկինների» հետ կապն ապացուցվում է նաև նրանով, որ խմբակցությունը կողմ չի քվեարկել «Ապօրինի ծագում ունեցող գույքի բռնագանձման մասին» օրենքին, Մարուքյանն ասաց, թե իշխանությունները մոլորեցնում են, թե «Լուսավոր Հայաստանը» պայքարում է այդ օրենքի դեմ: ««Լուսավոր Հայաստանը» ողջունել և կողմ է քվերակել այդ օրենքին՝ նշելով, որ ունենք առաջարկներ, որ այդ օրենքը լավը դառնա, չվնասի ՀՀ-ում ներդրումային միջավայրին, ներկայացրել ենք շուրջ 30 առաջարկ, ընդունվել է 1-2-ը, մյուսները մերժվել ենք: Այդ պատճառով երկրորդ ընթերցմանը ձեռնպահ ենք քվեարկել»,-ասաց նա՝ նշելով, թե դա իշխանությունների կողմից շահարկում է, իսկ «նախկինների» համատեքստում աշխատում են հենց իշխանությունները:
Անդրադառնալով «Իմ քայլը» խմբակցության ղեկավար Լիլիթ Մակունցի դիտարկմանը, թե Էդմոն Մարուքյանը նախորդ գումարման ԱԺ-ում իրեն նույն բառամթերքը թույլ չի տվել՝ նկատի ունենալով Ալեն Սիմոնյանին Մարուքյանի կողմից ուղղված հայհոյանքը, Մարուքյանն արձագանքեց, թե դա եղել է ի պատասխան Ալեն Սիմոնայանի՝ մեկուկես տարի ձգվող, հետևողական վիրավորանքներին, ինչը չի եղել նախորդ գումարման ԱԺ-ում:
: