ԱԱԾ նախկին տնօրեն Արթուր Վանեցյանը բավականին կշռադատված քաղաքական գործընթացներ է իրականացնում։ Իմ տպավորությամբ Վանեցյանի գրեթե բոլոր գրառումները քաղաքական օրակարգ են ձևավորում ու բավականին նյարդայնացնում իշխանությանը։ «Փաստինֆո»-ի եթերում ասել է քաղտեխնոլոգ Վիգեն Հակոբյանը։
Ըստ նրա՝ այսօր շատ գործիչներ գրեթե ամեն օր քաղաքական ասպարեզում փորձում են երեւալ, նույնիսկ օրվա մեջ մի քանի հարցազրույց են տալիս, բայց օրակարգ չեն ձեւավորում, մինչդեռ այլ է պատկերը Վանեցյանի պարագայում։ «Փաստն այն է, որ այն պահից, երբ Արթուր Վանեցյանը հայտ ներկայացրեց քաղաքական դաշտ մտնելու, պաշտոնից ազատվելու դիմում ներկայացնելու պահից, նրա յուրաքանչյուր հայտարարություն, գրառում, նույնիսկ նկարի հրապարակումը, քաղաքական օրակարգ են ձեւավորում։ Այսինքն՝ խոսքը գնում է արդյունավետության մասին»,- նշել է քաղտեխնոլոգը։
Վ.Հակոբյանի դիտարկմամբ՝ Ա.Վանեցյանի գրեթե ոչ մի գրառում, ոչ մի հայտարարություն աննկատ չի անցնում, դրանք նյարդայնացնում են իշխանություններին։ «Գուցե վտանգ են տեսնում, այնպիսի վտանգ, որ անտեսելու քաղաքականությունը չի աշխատում կամ ավելի վտանգավոր է, քան որեւէ ռեակցիա տալը։ Բայց խնդիրն այն է, որ այդ արձագանքը երբեմն նոր խնդիրներ է առաջացնում իշխանությունների համար»,- արձանագրել է բանախոսը։
Նրա կարծիքով՝ երբ ստեղծվի Արթուր Վանեցյանի հայտարարած կուսակցությունը, որը թերեւս կլինի արտակարգ դրության ավարտից, կամ սահմանափակումների վերանայումից հետո, շատ ավելի բովանդակալից գործունություն կիրականացնի։