ՀՀ առողջապահության նախարար Արսեն Թորոսյանն այսօր «Ազատություն» ռ/կ-ի եթերում հայտնեց, որ ՀՀ-ում թոքաբորբով մոտ 700 պացիենտ կա: Ծայրահեղ ծանր վիճակում են 32-ը, ծանր վիճակում` 65-ը: 11 պացիենտ միացված է թոքերի արհեստական շնչառության սարքերին:
«Թվերի աճին զուգընթաց՝ թոքաբորբ ունեցող քաղաքացիների թիվն աճում է, սակայն ծայրահեղ ծանր և ծանր վիճակում գտնվողների թիվը հարաբերականորեն կայուն է, ինչն արդեն լավ ցուցանիշ է: Թոքերի արհեստական շնչառության սարքերին միացված քաղաքացիների թիվն էլ տատանվում է 10-ի շուրջ. դրանից ավելի դեռ չենք ունեցել»,- ասաց նախարարը:
Արսեն Թորոսյանն անդրադարձել է կորոնավիրուսով վարակված այն դեպքերին, որոնց բուժումն այսուհետ իրականացվելու է տնային պայմաններում:
«Նրանք տեղորոշման համակարգով վերահսկվելու են: Մենք անցնելու ենք ինքնամեկուսացման ռեժիմի թե՛ կոնտակտավոր անձանց համար, թե՛ այն քաղաքացիների, որոնք ունեն վարակի հաստատում, բայց չունեն որևէ սիմպտոմ: Տեղորոշման համակարգից զատ նաև ձևավորվել են 119 շրջիկ խմբեր՝ ձևավորված բժշկից, ոստիկանից և ԱԻՆ աշխատակցից, որոնք նաև տնային այցեր են իրականացնելու` հսկելու համար ինքնամեկուսացման պահպանումը: Կարծում եմ` ինչ-որ էֆեկտիվություն այն կունենա: Այլ գործիք պարզապես չկա»,- ասել է նախարարը:
Մանրամասները` տեսանյութում: