Հայաստանում արտակարգ դրություն է, որն իրենից արտակարգ անառակ քաոս է ներկայացնում. արտակարգ դրությունն այժմ վերաբերում է սոսկ քաղաքական հավաքներին ու միտինգներին: Այս մասին Hraparak.am-ի հետ զրույցում հայտարարել է նախկին վարչապետ, տնտեսագիտության դոկտոր Հրանտ Բագրատյանը:
Ըստ Հրանտ Բագրատյանի՝ Հայաստանում երրորդ անգամ արտակարգ դրության ռեժիմի ժամկետի երկարաձգմամբ խախտվել է Սահմանադրությունը.
«Սահմանադրության 120-րդ հոդվածն ասում է, որ արտակարգ դրություն կարելի է մտցնել, իսկ արտակարգ դրության մասին օրենքն ասում է՝ հանրապետությունով մեկ, բայց ոչ ավելի, քան 30 օր Ես ուզում եմ խստությունները լինեն իրականության մեջ, գործողությունների մեջ: Թե չէ այնպես է ստացվել, որ Հայաստանում ԱԴ է, որն արտակարգ անառակ քաոս է իրենից ներկայացնում։ Ըստ իս՝ ԱԴ-ն ներկայումս վերաբերում է սոսկ քաղաքական հավաքներին ու միտինգներին», ասել է Հրանտ Բագրատյանը։
Նախկին վարչապետն ասել է, թե կառավարությունը հիմա անում է այն, ինչ ինքը սկզբից էլ առաջարկում էր անել.
«Ես ասում էի, որ նախեւառաջ պետք է փոխհատուցել մարդկանց եկամուտների կորուստները, այլ ոչ թե գազի վարձը, հոսանքի վարձը, այո, նման փոփոխություն նկատվում է։ Այսինքն՝ մի քանի տասնյակ միլիարդ դրամ կորցնելուց, վատնելուց հետո կառավարությունը հիմա որոշել է եկամուտները փոխհատուցել, օրինակ, օժանդակության 18-րդ փաթեթը: Մինչ այդ՝ այս կամ այն ծախսը փոխհատուցելը, այս կամ այն ընկերությանը արտոնություններ տալը եւ այլն, էս բոլորը հիմարությունների ոլորտից են»։
Բագրատյանը հիշեցրել է, որ վարչապետը երեկ նաեւ վարկերի, վարկային տոկոսների փոխհատուցումից է խոսել։
«Սա եւս վկայում է այն մասին, որ վարչապետը պատկերացում անգամ չունի՝ ինչպես պետք է կառավարել համաճարակը։ Նա ուղն ու ծուծով պոպուլիստ է։ Ինչո՞ւ եմ այսպես ասում, որովհետեւ, նախ, բանկերի վարկերը ներելը կառավարության գործը չէ։ Եթե կառավարությունն ուզում էր այստեղ փոփոխություն մտցնել, նա կարող էր Աժ-ում օրենք ընդունել՝ պարտադրելով Կենտրոնական բանկին, որ այն քաղաքացիները, որոնք վարկ են վերցրել, բայց ԱԴ պատճառով իրենց արտադրությունը փակվել է, ապա վարկային տոկոսի ռիսկը մասամբ կիսվի տվյալ բանկի հետ, որից վերցվել է այդ վարկը։ Երկու-երեք ամսվա փոքրիկ զեղչի մասին է խոսքը։ Իսկ, ընդհանրապես, երբ որ վարչապետն ասում է՝ ես էս վարկերը փակել կտամ, դա պոպուլիստական ալեգորիա է», ասել է նախկին վարչապետը:
Հրանտ Բագրատյանը հարց է բարձրացնում՝ բյուջեից տոկոսն ինչո՞ւ է կառավարությունը փոխհատուցում, երբ որ նույն ընկերությանը վարկ է տալիս, եթե տուժել է կորոնավիրուսից։
«Վարչապետը պետք է իմանա, որ եթե այդ ծախսերը փակվում են բյուջեից, ապա դրանք պետք է հաստատվեն Ազգային ժողովի կողմից։ Նա պարզապես կատարում է տարրական հանցագործություն՝ հանուն իր պոպուլիզմի»:
Երկրում, Բագրատյանի բնորոշմամբ, խայտառակ վիճակ է.
«Մեզ շրջապատող բոլոր երկրներում՝ ոչ միայն Վրաստանում եւ Ադրբեջանում, այլ նաեւ Թուրքիայում եւ Իրանում ամեն օր բուժվածների թիվը զգալիորեն գերազանցում է հիվանդացածներին։ 2020-ի մարտի 16-ից ի վեր, երբ ԱԴ է մտցվել, ՀՀ-ում հիվանդների թիվն ավելացել է 150 անգամ։ Հայաստանում նոր պիկ է սկսվել պարետ Ավինյանի հանցավոր անգործության արդյունքում։ Իսկ առողջապահության նախարարն էլ հայտարարում է, որ եւս հինգ տարի կարող է տեւել այս իրավիճակը: Աշխարհում չգիտեն, բայց այդ մարդը գիտի: Ես ուղղակի ամաչում եմ, որ էդ կարգի մարդը մեր առողջապահության նախարարն է, որ նման հոգնած պեսիմիզմ ու հոռետեսություն է հաղորդում մեզ։ Քանի նա առողջապահության նախարար է, մենք այս համաճարակից դուրս չենք գա։ Իր, պարետ Ավինյանի, ինչպես նաեւ Փաշինյանի մեղքով է, որ հանրապետությունն այսօր գտնվում է այնպիսի վարակի մեջ, որն արդեն համեմատելի է մեր ազգի պատմական ողբերգությունների հետ։ Վաղը, մյուս օրը Վրաստանը մի երկու շաբաթից լրիվ կմաքրի երկիրը, Ադրբեջանը՝ մի երեք-չորս շաբաթից, Իրանը մի ամսից լրիվ մաքուր դուրս կգա, եւ այդ երկրները չեն ուզենա վարակված ու «կեղտոտ» Հայաստանի հետ շփվել»: