ՀՀ վարչապետ Նիկոլ Փաշինյանն այսօր առցանց ասուլիսի ժամանակ անդրադարձավ հարցին՝ արդյո՞ք Հայաստանում վերահսկելի է կորոնավիրուսի հետ կապված իրավիճակը: Վարչապետը պատասխանեց.
«Իրավիճակի վերահսկելիություն ասելիս ի՞նչ նկատի ունեք. 2027 ընդհանուր հիվանդների թիվ ունենք երեկվա վիճակագրությամբ, սա մեծ և համարյա սարսափելի թիվ է, բայց երբ մտնում ենք դետալների մեջ, արձանագրում են՝ 1895-ը նույնիսկ ջերմություն չունի, այս հիվանդների մեջ թոքաբորբ ունի 690-ը, ընդ որում, թեթև թոքաբորբներն են հաշվառված, որ մարդիկ ոտքի վրա են տանում, ծանր թոքաբորբ ունի 31-ը, սարքին միացված է 11 հիվանդ»:
Այսպիսի վիճակագրությունը, այսինքն՝ հիվանդների թիվը, ախտորոշված պոզիտիվների թիվը եթե անգամ լինի 10 000, բայց թոքաբորբով հիվանդների ու բուժման որոշակի ծանր ստադիայում գտնվող հիվանդների թիվը ցածր լինի 1400-ից, այդ իրավիճակը վերահսկելի է:
«Այսինքն՝ հիմա, ուսումնասիրելով իրավիճակը, եկել, կոնկրետ ցուցանիշներ ենք դրել, որոնցով պետք է կողմնորոշվենք՝ վերահսկելի՞ է իրավիճակը, թե՞ չէ: Զուտ առողջապահական տեսակետից այսօրվա վիճակը պրոբլեմ չեմ համարում, խնդիրն անկանխատեսելիությունն է»,- ասաց նա: