Կորոնավիրուսը պատերազմ է անտեսանելի մանրէի դեմ, և մենք այդ պատերազմի դաշտում թերացել ենք՝ դատելով հիվանդացության՝ օրեցօր ահագնացող թվերից. այդ ամենը վերլուծության առարկա պետք է դառնա, քանի որ անհրաժեշտ է պատրաստվել հիվանդացության երկրորդ ալիքին, որը հավանաբար կունենանք այս աշնանը: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել ԵՊԲՀ ռեկտորի խորհրդական, առողջապահության նախկին փոխնախարար Գագիկ Միրիջանյանը:
«Կարանտինային ռեժիմի թուլացման արդյունքները կտեսնենք 10-15 օր հետո: Առողջապահական համակարգում այսօր կան լուրջ խնդիրներ, բուժանձնակազմն արդեն չի բավականացնում: Իրավիճակը զարգանում է վատ սցենարով, և միայն մեր բժիշկների շնորհիվ է հաջողվում ավելի շատ մահեր չունենալ»,- ասել է բժիշկը:
Ըստ Միրիջանյանի՝ առաջիկայում կունենանք օրական նոր հակառեկորդներ, հիվանդացության թիվը կմեծանա. «Կանխարգելիչ միջոցառումներ իրականացնելու, լոկալիզացիայի իմաստ այլևս չկա, պատկան մարմիններն արդեն բաց են թողել օջախները: Առանց ախտանշանների վարակակիրների բուժումը տնային պայմաններում ճիշտ քայլ է: Ինչ վերաբերում է Մարզահամերգային համալիրի նախասրահում հոսպիտալ բացազատելուն, դա սխալ որոշում է, այդտեղ չի կարող բժշկական օգնություն ցուցաբերվել այդքան մարդու՝ այդ ջերմաստիճանի պայմաններում»:
Բժշկի պնդմամբ՝ մահը վրա է հասնում ոչ թե կորոնավիրուսից, այլ նրա առաջացրած խնդիրներից, և այդ է պատճառը, որ առավել զգույշ պետք է լինեն քրոնիկական հիվանդություններ ունեցողներն ու տարեց մարդիկ, որոնց իմունիտետը թույլ է. «Կան դեպքեր, երբ մարդիկ եղել են բացարձակ առողջ, և հնարավոր է՝ թաքնված իմունիտետային խնդրի պատճառով կորոնավիրուսը մահվան է հանգեցրել, բայց ամենախոցելին, միևնույն է, թիրախային խմբերն են»:
Գագիկ Միրիջանյանի կարծիքով՝ համաշխարհային բժշկագիտությունն այս փուլում արդեն կենտրոնացել է ոչ թե կանխարգելման, այլ բուժման վրա. «Ոչ ոք չի կարող բացառել, որ այս հիվանդությունից ապաքինված մարդիկ դարձյալ կարող են վարակվել, նման դեպքեր եղել են: Պատվաստանյութի հայտնաբերումը միակ լուծումն է, կամ էլ գոնե պետք է գտնվի այն ուժեղ դեղորայքը, որը թիրախային կազդի և կկանխի հիվանդացումը»:
Բժշկի պնդմամբ՝ այս փուլում ստացիոնար բուժօգնություն պետք է ստանան միայն վատ ինքնազգացողություն և քրոնիկական հիվանդություններ ունեցողները, քանի որ բոլոր վարակակիրներին հիվանդանոցներում միաժամանակ տեղավորելու հնարավորություն չկա:
«Առնվազն առաջիկա մեկ տարում կորոնավիրուսը մեզ ուղեկցելու է: Մոտ հինգ միլիոն մարդ ամբողջ աշխարհում արդեն վարակվել է, պատկերացրեք՝ նրանցից յուրաքանչյուր քանի հոգու է վարակել: Հայաստանում այս տեմպերով կես միլիոն մարդու վարակվելը հավանական սցենար է»,- ամփոփել է ԵՊԲՀ ռեկտորի խորհրդականը: