Այսօր հրավիրած մամուլի ասուլիսում, խոսելով ՀՀ ում կավասակի հիվանդության մասին, Առողջապահության նախարար Արսեն Թորոսյանն ասաց, որ մինչև կորոնավիրուսի համավարակը ՀՀ-ում եղել է կավասակի սինդրոմով 3 դեպք, որի վիճակագրությունն այս տարի նույն է, չի փոխվել: «Երեխաները շատ թեթև են տանում հիվանդությունը, բայց դա չի նշանակում, որ պետք թուլացնենք զգոնությունը նրանց նկատմամբ»:
Անդրադառնալով կորոնավիրուսով վարակված երեխաների հարցին՝ նախարարն ասաց, որ երեկվա դրությամբ ունենք
270 երեխա, որոնցից 2-ն ունի թոքաբորբ, որը թեթև բնույթի է և կյանքին սպառնացող վտանգ չկա:
Ինչ վերաբերում է հղիներին, Ա. Թորոսյանն ասաց, որ 23 հղի ունենք, որոնց կյանքին նույնպես վտանգ չի սպառնում:
Հարցին՝ կորոնավիրուսով վարկավածներին բուժելու կադրերի խնդիր ունե՞նք, թե՞ ոչ, Առողջապահության նախարարը պատասխանեց, «Այո, ունենք. այդ խնդիրը գրեթե միշտ ունեցել ենք: Խոսքը հատկապես վերակենդանացման բաժանմունքների ռեանիմատոլոգներին է վերաբերում, այսինքն՝ նրանց դեֆիցիտը եղել է նաև մինչև կորոնավիրուսը: Մենք այսօր փորձում ենք մոբիլիզացնել առկա ռեսուրսները, որպեսզի, եթե բռնկումը շատանա՝ մենք կարողանանք ավելի շատ թվով վարակվածների բուժել: Սակայն ուզում եմ նշել, որ այդ ժամանակ, միևնույն է, մենք բժիշկների կարիք ունենալու ենք, ինչպես աշխարհի բոլոր երկրները»:
Արսեն Թորոսյանը տեղեկացրեց, որ վարկված բուժաշխատողների ընդհանուր թիվը 375 է, ինչը կազմում է հիվանդների 6-7 տոկոսը: