«Դիմակները խնդիր են առաջացնում նույնիսկ առողջ մարդու մոտ՝ առաջացնելով թթվածնային քաղց, ինչը կարող է բազմաթիվ խնդիրներ առաջացնել։ Մարդկանց մոտ ալերգիկ ֆոնն է բարձրացնում, սրտանոթային համակարգի խնդիրներն ավելի են լրջանում»,- լրագրողների հետ հանդիպման ժամանակ ասաց «Paracelsus» ՀԿ հիմնադիր և ղեկավար, բժիշկ Նունե Ներսիսյանը։
Նա չի կարծում, որ վարչապետը լուրջ հայտարարություններ է անում, որովհետև արդեն 2 տարի, նրա խոսքով, ոչ մի լուրջ հայտարարություն վարչապետից չեն լսել։
«Թող մեր պետական այրերը ինձ մեղադրեն, բայց ես որպես բժիշկ, մտածելով մարդկանց առողջության մասին, կոչ եմ անում դիմակ չկրել, եթե վարակակիր չեք»,- նշեց Ն. Ներսիսյանը։
Նա տեղեկացրեց, որ համացանցում արդեն 3 օր է ստորագրահավաք է պտտվում, Արսեն Թորոսյանի վերաբերյալ դատախազություն դիմում է ներկայացնելու Քրեական օրենսգրքի 308 և 309 հոդվածներով՝ հանցավոր անգործություն, պաշտոնական դիրքի չարաշահում։
«Ինչ որ «Բերմունդյան եռանկյունի» է դարձել՝ վարչապետ-պարետ-առողջապահության նախարար, ամեն մեկն ինչ որ բան ասում են ու ժողովրդին շատ վատ իրավիճակի մեջ են դնում։ Մի ժամանակ հենց առողջապահության նախարարը հայտարարում էր, որ դիմակներ կրելը պարտադիր չէ, որ վիրուսը շատ փոքր է և այդ անցքերով կարող է ներթափանցել, այսօր, չգիտեմ ինչ պատճառներով, նաև եթե հավատանք լուրերին՝ դիմակների բիզնես և այլն, կարող ենք հասկանալ, որ այս ամենը զուտ բիզնեսի շահարկումներով է կատարվում։ Պարտադրել մարդկանց դիմակ դնել, հիմա էլ ինչ-որ խոսքեր կան, որ դիմակը պետք է տանը դնել, ծիծաղելի է»,- ասաց նա։
Ն. Ներսիսյանը նշեց, որ վերջերս առողջապահության նախարարը ֆեյսբուքում դիմակով լուսանկարն էր տեղադրել ու գրել՝ «new normal». «Դա գլոբալիստների ծրագրի մի թեզ է, որը շրջանառվում է և, կարծում եմ, սրանով իսկ ուզում են մարդկանց ավելի շատ զոմբիացնել, բթացնել»։
Ասուլիսին ներկա «Հայաստան» համահայկական հիմնադրամի նախկին գործադիր տնօրեն Արա Վարդանյանի խոսքով, կորոնավիրուսի հետ կապված բոլոր խնդիրներն ի ցույց են դնում կառավարության քայերի սնանկությունը, անընդմեջ իրար հակասելու խնդիրը։
«Չեմ հասկանում՝ ինչու համար է ստեղծվել պարետատունը, երբ որ պարետը, վարչապետը, առողջապահության նախարարը պետք է իրար հակասեն իրենց հայտարարություններով։
Վարչապետը ստեղծել է պարետատուն, բայց, կարծես թե պարետը հենց ինքն է։ Կասկած չունեմ՝ վերջում միգուցե պետք լինի մեկին պատժել և այդ պատժվողը լինի հենց պարետը»,- ասաց Ա. Վարդանյանը։
Նրա խոսքով, բարդ ժամանակ է, երբ ունես բժիշկների մի խումբ, բոլորը տարբեր առաջարկներ են տալիս։
Ա. Վարդանյանի կարծիքով, ժամանակն է ստեղծել բժշկական հանձնախումբ գուցե պարետի ենթակայության տակ, որտեղ կներգրավեն Հայաստանի ամենանշանակի բժիշկները, որոնք կկարողանան ամենօրյա ֆորմատով քննարկել իրավիճակն ու տալ իրավիճակային լուծումներ ու հասարակությանը դիմեն ամեն օր մեկ միասնական ուղերձով։
«Տպավորությունն այն է, որ Արսեն Թորոսյանն է բոլոր որոշումները միայնակ կայացնում։ Կարծում եմ՝ սխալ է»,- նշեց նա։
Նունե Ներսիսյանն ասաց, որ բժիշկները խումբը ստեղծված է եղել, ինքը, նաև ՁԻԱՀ կենտրոնի համաճարակաբաններն այդ խմբում են եղել, դիմել են առողջապահության նախարարություն, մերժում են ստացել։
«Այստեղ միանձնյա որոշում է։ Խնդիրն այն է, որ վարչապետը չլինելով բժիշկ կամ պարետը կամ Արսեն Թորոսյանը ապակողմնորոշում են և մեր նման մարդկանց չեն ուզում լսել, ինչի մասին բազմաթիվ անգամ ասել ենք, փորձել ենք ինքներս տարբեր կլինիկաներ այցելել, փորձել ենք որևէ հարցով օգտակար լինել, բայց մարդիկ չեն ընդունում։ Երևի իրենց ճիշտը պետք չէ։
Ճիշտ եք ասում, երևի վարչապետն է պարետը։ Որպես բժիշկ կարող եմ հայտարարել, որ մեր վարչապետն այսօր միանձնյա մեր երկրի գլխավոր համաճարակաբանն է»,- նշեց նա։