Հասարակության շրջանում իշխանության նկատմամբ վստահությունը պահպանվել է, թե ոչ՝ ցույց կտան հերթական ընտրությունները։ Ազգային ժողովում լրագրողների հետ զրույցի ժամանակ այս մասին ասաց Արարատի մարզպետ Գարիկ Սարգսյանը՝ ընդգծելով, որ դատողը և քվե տվողը ժողովուրդն է։
Դիտարկմանը, որ Հայաստանում հաջորդ ընտրություններին չեն սպասում և ուզում են՝ իշխանափոխություն լինի, մարզպետն ասաց. «Դա իրենց խնդիրն է։ Ժողովրդի հետ մեր շփումները բոլորովին այլ բան են ասում»,-ասաց Գարիկ Սարգսյանը։
Հարցին՝ հաջողե՞լ է կորոնավիրուսի դեմ պայքարն Արարատի մարզում, Գարիկ Սարգսյանը նշեց, որ թեժ կետերից է մարզը. «Երևանից ևս մեկ մարզից հետո երրորդն էինք թվով, բայց հիմնականում նայելով դինամիկային՝ կարող եմ հստակ ասել, որ մեր մարզում դինամիկան առերևույթ չի փոխվում դեպի թեժացում։ Այսինքն կորը սահուն է բարձրանում, այլ ոչ թե ունենում ենք նոր օջախներ, որոնք վերահսկողությունից դուրս են լինում։ Մեր մարզի հիմնական օջախը հայտնի ձեռնարկությունում մեր մարզից մեծաքանակ աշխատակիցներ ունենալու հետ է կապված և հիմնականում Մասիսի տարածաշրջանն էր։ Այս պահին էլ Մասիս քաղաքը մեր ամենամեծ օջախն է, բուժվածների և վարակվածների ընդհանուր թիվը 177-ի է հասնում, բայց ամեն դեպքում իրավիճակը մեր հսկողության ներքո է գտնվում։ Առաջիկայում էլ ինձ չի թվում, որ նման գործելաոճի արդյունքում կարող ենք ունենալ ինչ-որ նոր, չվերահսկվող և մեզ համար սյուրպրիզ օջախներ։ Ընթացքը բոլորիս համար կանխատեսելի է»,-ասաց Գարիկ Սարգսյանը։