Այսօր Ազգային ժողովի հատուկ նիստին «Բարգավաճ Հայաստան» խմբակցության պատգամավոր Վարդևան Գրիգորյանը, դիմելով ՀՀ վարչապետ Նիկոլ Փաշինյանին, ասաց, որ վարչապետը նախկինում հայտնել էր, որ հանրապետությունում ավելի քան հարյուր հազար վարակակիր կա, բայց այսօր ընդամենը 15 հազարն է բացահայտված, ինչն ուղղակի լուրջ վտանգ է:
Պատգամավորը նշեց, որ ոչ մեկը չի հերքում, որ կանոննների պահպանումը լուրջ ազդեցություն կարող է ունենալ վարակի տարածման հարցում, բայց կարծում է, որ ամեն դեպքում դա քիչ է: «Չե՞ք կարծում, որ պետք է թեստավորումների քանակն ավելացնել, շուտ հայտնաբերել վարակակիրներին, որը հնարավորություն կտա ավելի քիչ մարդկանց վարակվելու»,-ասաց նա:
Վարչապետը, ընդհանուր առմամբ, համաձայնեց պատգամավորի հետ և նշեց, որ վարակվածների ճշգրիտ թիվ ոչ մեկը չի կարող ասել, և վարկած կա, որ 40, 70, 100 հազար և ավելի վարակակիր կա:
Վարչապետը նշեց, որ եթե զորամաս գնալու անհրաժեշտություն չլիներ և զինվորների նկատմամբ կրկինակի ուշադիր լինելու անհրաժեշտություն չլիներ, կարող էր այդ մի շաբաթն էլ անցկացնել, և ոչ ինքը, ոչ որևէ մեկը չիմանար, որ ինքը վարակված է: Ինչ վերաբերում է թեստավորման ավելացմանը, ապա Նիկոլ Փաշինյանն ասաց, որ քննարկել են, և թեստերի քանակը հնարավորինս կավելացվի:
«Ես ձեր առաջ ելույթ եմ ունեցել և չեմ իմացել, որ վարակված եմ, դուք էլ չեք իմացել: Մենք բոլորս մեզ պետք է վերաբերվենք որպես կորոնավիրուսով վարակակիր»,-ասաց նա: