Հնդկաստանի Մահարաշտրա նահանգում գտնվող Լոնար լիճը վերջին օրերին անսպասելիորեն վարդագույն է դարձել, հայտնում է CNN-ը։
Երկրաբան Գաջանան Խարատի խոսքով՝ նախկինում պատահել է, որ լիճը փոխի իր գույնը, սակայն ոչ այսչափ նկատելի։
«Այս տարի այն յուրահատուկ վառ երանգի է, քանի որ ջրի աղիության մակարդակը բարձրացել է։ Լճում ջրի քանակը նվազել է, հետևաբար այն ավելի է փոքրացել, այդ պատճառով էլ աղի քանակության ավելացման հետ մեկտեղ ներքին փոփոխություններ են տեղի ունեցել»,- նշել է գիտնականը։
Այժմ մասնագետները կատարվածի մի քանի վարկած են դիտարկում՝ ջրի աղիության մակարդակի բարձրացում և կարմիր ջրիմուռների թվի աճ։
Փորձանմուշներն ուղարկվել են մի քանի լաբորատորիա: «Եվ երբ դրանք ուսումնասիրվեն, մենք կկարողանանք հստակ ասել, թե ինչու է լճի ջուրը դարձել կարմրավուն»,- ասել է նա: