Երեք ԲԿ պատրաստ են կորոնավիրուսային հիվանդների բուժման և հայտ են ներկայացրել

Առողջապահության նախարարությունը հունիսի 15-ի դրությամբ երեք բժշկական կենտրոնից է հայտ ստացել, որոնք ցանկություն են հայտնել կորոնավիրուսային հիվանդության բուժման գործընթացում ներգրավվել։ Այս մասին նշված է Panorama.am-ի՝ հունիսի 8-ի գրավոր հարցման պատասխանում։

Հարց- Հայաստանում կորոնավիրուսային հիվանդության բուժման գործընթացում քանի՞ բժշկական կենտրոն է ընդգրկված։

Պատասխան– ՀՀ-ում կորոնավիրուսային հիվանդությամբ (COVID-19) պացիենտների բուժման և սպասարկման գործընթացում ներկայում ամբողջությամբ կամ մասնակի ներգրավված են թվով 17 բժշկական օգնություն և սպասարկում իրականացնող կազմակերպություններ:

Այնինչ՝ օրեր առաջ կորոնավիրուսով հիվանդը մահացավ տանը՝ շտապօգնության չժամանելու պատճառով։

Հարց– Այդ ԲԿ-ներից քանիսի՞ն են Երևանում, քանի՞սը մարզերում։

Պատասխան– Վերոնշյալ բժշկական օգնություն և սպասարկում իրականացնող կազմակերպություններից 11-ը տեղակայված են Երևանում, իսկ 6-ը` ՀՀ մարզերում:

Այնինչ՝ կորոնավիրուսով հիվանդները առանց բացասական թեստի դուրս են գրվում հիվանդանոցներից՝ տանը շարունակելու բուժումը, և տուն պետք է գնան իրենց ուժերով, ոչ շտապօգնության մեքենանաներով։ Իրենց ուժերով՝ այսինքն տրանսպորտով, ինչը վարակ տարածելու ամենահնարավոր ուղիներից է։

Հարց– Ինչպե՞ս են որոշում, թե որ ԲԿ-ն է ընդգրկվում կորոնավիրուսային հիվանդության բուժման գործընթացում։

Պատասխան– Կորոնավիրուսային հիվանդության բուժման գործընթացում կարող են ներգրավվել այն բժշկական կազմակերպությունները, որոնց շենքային պայմանները համապատասխանում են սանիտարական և հակահամաճարակային նորմերին, ինչպես նաև առկա է համապատասխան բժշկական անձնակազմ:

Այնինչ՝ թիվ 1 հիվանդանոցը դեռ մարտ-ապրիլին էր նկարներ հրապարակել ֆեյսբուքում և հայտարարել, որ լիարժեք պատրաստ է հիվանդներ ընդունելու ու այդպես էլ դատարկ մնացել էր այն դեպքում, երբ հիվանդները հերթ են կանգնում, որպեսզի հիվանդանոցային բուժում ստանան։

Հարց- Դիտարկե՞լ է ՀՀ ԱՆ-ն այլ ԲԿ-ներին ևս ներառել կորոնավիրուսի բուժման ընթացքին՝ նախքան հիվանդներին տուն ուղարկելու որոշումը, ինչը պատճառաբանվում էր տեղ չունենալով։

Պատասխան– Կորոնավիրուսային հիվանդության բուժման գործընթացում բժշկական կազմակերպությունների հետագա ներգրավվածության հարցը կրում է շարունակական բնույթ:

Տես վերևի «այնինչը»։

Հարց– Քանի՞ ԲԿ կա ընդհանրապես ՀՀ-ում, և արդյո՞ք ՀՀ ԱՆ-ն ինքնուրույն գնահատել է նրանց պոտենցիալը՝ կորոնավիրուսային այս «դժոխքային» պայմաններին չհասնելու, կամ գոնե՝ «դժոխքից» դուրս գալու համար։

Պատասխան– 2019թ. «Առողջություն և առողջապահություն» վիճակագրական տարեգրքի Աղյուսակ 5.1-ում առկա տեղեկատվության համաձայն, 2018թ. դրությամբ ՀՀ-ում հիվանդանոցային բժշկական օգնություն իրականացվում է թվով 124 հաստատություններում։

Կորոնավիրուսային հիվանդության բուժման գործընթացում բժշկական կազմակերպությունների ներգրավվածության հարցը Առողջապահության նախարարությունը քննարկում է համապատասխան բժշկական կազմակերպության տնօրինության կամ հիմնադրի հետ համատեղ:

Հարց– Քանի՞ հայտ է ստացել ՀՀ ԱՆ-ն մինչ մեր հարցերի պատասխանելու պահը կորոնավիրուսային հիվանդության բուժման գործընթացում ներգրավվելու ցանկություն ունեցող բժշկական կենտրոններից։

Պատասխան-Ներկա պահին Առողջապահության նախարարությունը ստացել է թվով 3 հայտ:

Հարց- Քանի՞ լաբորատորիայում է արվում ՊՇՌ թեստավորում։

Պատասխան– ՀՀ-ում կորոնավիրուսային հիվանդության նկատմամբ ՊՇՌ լաբորատոր հետազոտություններ պետական պատվերի շրջանակներում իրականացվում են թվով 6 կազմակերպություններում:

Այնինչ՝ թեստավորում անցնելու համար հիվանդները, որոնք ունեն կորոնավիրուսային ախտանիշեր ու ուրեմն վարակակիր են, կրկին «իրենց ուժերով» են գնում թեստավորման՝ կրկին դառնալով վարակի տարածման աղբյուր։

Դա այն դեպքում, երբ ընդամենը ապրիլ ամսին նման ախտանիշով մարդկանց ստիպում էին մնալ տներում՝ կարանտինային պայմաններում՝ օրինակ բերելով «Էջմիածնի դեպքը»։

Ինչու չի կազմակերպվում տներից թեստավորման պրակտիկան՝ հայտնի չէ։

Հարց – Երևանյան ԲԿ-ներում կորոնավիրուսով քանի՞ պացիենտ է բուժում ստանում։

Պատասխան– 12.06.2020թ. ժամը 9:00-ի դրությամբ Երևանի բժշկական կազմակերպություններում բուժօգնություն է ստանում կորոնավիրուսային հիվանդությամբ 1465 պացիենտ:

Այնինչ՝ օրեր առաջ երկու հիվանդ մահացան տներում՝ հիվանդանոցներում տեղ չլինելու պայմաններում։

Մինչ վրացահայերի կազմակերպած օգնությունը՝ ներմուծել տասնյակներով շնչառական ապարատներ, ֆեյսբուքում վարչապետին ուղիղ դիմում կար քաղաքացուհուց, ում մայրը վերակենդանացման բաժամունքում էր, որ շնչառական ապարատների պակաս կա ու նույնիսկ ապարատները մի հիվանդից մյուսին են ժամանակ առ ժամանակ տանում, որպեսզի ավելի շատ մարդ շնչելու հնարավորություն ունենա։

Այնինչ կարելի էր դիմել օգնության համար՝ «ուսադիրները չէին ընկնի», բայց մարդիկ կփրկվեին։

Այսօր առողջապահության նախարարը հայտնել է, որ 143 հոգի կարիք ունի հոսպիտալացվելու։

Ամեն օր արդեն արձանագրվում է 600-ից ավելի վարակակիր հանրապետությունում, որոնք փաստորեն տներում սպասում են թոքաբորբային նշանների, որպեսզի տեղ ունենան (կամ չունենան) հիվանդանոցներում բուժում ստանալու։

Կարանտինի սկզբից ի վեր, ըստ տեղեկությունների, 900-ից ավելի բժիշկ է վարակվել կորոնավիրուսով, երբ կարելի էր ի սկզբանե ապահովել կամ պարտադրել պաշտպանիչ միջոցների։

Այժմ վտանգի տակ են արդեն պոլիկլինիկաների բժիշկները։

Ոչ համակարգված, հակասական, ոչ հետևողական առողջապահական…  «քաղաքականությունը» երկիրը ու քաղաքացիներին պահում է ահագնացող վարակի պայմաններում։

«Ինչն ենք սխալ անում»՝ այսօր հարցով դիմում է վարչապետը, հասկանալու, թե ինչու դիմակներ չեն կրում քաղաքացիները։

Հավանաբար չորս ամիս հետ են դեռ իրավիճակի գնահատումով, ով գիտե։ Բայց հաստատ ավելի շահավետ է առողջապահության առումով դիմակներ բաժանել քաղաքացիներին ու ստիպել կրել, քան տուգանել ու բաց թողնել։