ՀՀ գործող սահմանադրությունը նշում է՝ սահմանադրական փոփոխությունները ենթակա են նախնական սահմանադրական վերահսկողության։ Ես արձանագրում եմ փաստ, որ ՀՀ ՍԴ-ն նման փաստաթուղթ, նման նախագիծ չի քննարկել։ Այս մասին այսօր լրագրողների հետ զրույցում ասաց ՍԴ նախագահ Հրայր Թովմասյանը։
Հարցին՝ նախագիծն առերևույթ հակասահմանադրակա՞ն է, Հրայր Թովմասյանն ասաց. «Ես ոչ առերևույթ, ոչ ըստ էության, ոչ խորությամբ այդ հարցը չգիտեմ։ Ընդամենը ասում եմ, որ այն, ինչ գրված է, դրանով ենթադրվում է դա։ Կա իրավունքի սկզբունք՝ առ ոչինչ իրավական ակտերին անձն իրավունք չունի ենթարկվել»,-ասաց Հրայր Թովմասյանը։
Ինչ վերաբերում է 213-րդ հոդվածը խորհրդարանի փոփոխությունների տիրույթում պետք է լիներ, թե ոչ, ՍԴ նախագահը նկատեց՝ դա կարող է դառնալ սահմանադրական վերահսկողության առարկա. «Ինչ վերաբերում է քաղաքական գնահատականներին, ապա շատ մեծ զսպվածություն ցուցաբերելով՝ պետք է ընդամենն ասեմ՝ երեկ մեր ԱԺ-ում տեղի ունեցածի համար որպես իրավաբան, որպես սահմանադրության հեղինակներից մեկ, պարզապես ամոթի զգացողություն ունեմ»,-ասաց Հրայր Թովմասյանը։
Վերջինս նշեց՝ նմանատիպ իրավիճակներում անձը չունի ներպետական համակարգում դատական պաշտպանության իրավունք։