ՀՀ քննչական կոմիտեի հատկապես կարեւոր գործերի քննության գլխավոր վարչությունում քննվող քրեական գործով պարզվել են ՀՀ ԱՆ քաղաքացիական կացության ակտերի գրանցման գործակալության Էրեբունու եւ Նուբարաշենի տարածքային բաժնում՝ Երեւանի բնակիչ Ա.Վ.-ի կողմից առերեւույթ սուտ տեղեկություններ հաղորդելով հայրության ճանաչման ակտ գրանցելու եւ այդ կապակցությամբ կազմված կեղծ ակտը հետագայում դատարան ներկայացնելու դեպքի մի շարք հանգամանքներ:
ՀՀ քննչական կոմիտեի տեղեկատվության եւ հասարակայնության հետ կապերի բաժնից հայտնում են, որ քննությամբ ձեռք բերված տվյալների համաձայն՝ ՀՀ հատուկ քննչական ծառայությունում քննված քրեական գործով 2018թ. հունիսի 18-ին Ա.Վ.-ն ներգրավվել է որպես մեղադրյալ՝ ՀՀ քրեական օրենսգրքի 131-րդ հոդվածի (մարդուն առեւանգելը) 2-րդ մասի 1-ին, 2-րդ եւ 3-րդ կետերով, նրա նկատմամբ որպես խափանման միջոց է ընտրվել կալանավորումը եւ հայտարարվել հետախուզում: 2018թ. հոկտեմբերի 4-ին Ա.Վ.-ն հայտնաբերվել եւ բերման է ենթարկվել, իսկ հաջորդ օրը վերջինիս նկատմամբ ընտրված խափանման միջոց կալանքը փոխարինվել է գրավով: 2018թ. դեկտեմբերի 13-ին Ա.Վ.-ի եւ նրա հանցակցի վերաբերյալ քրեական գործը՝ մեղադրական եզրակացությամբ, ստացվել է Երեւան քաղաքի ընդհանուր իրավասության դատարանում:
Ա.Վ.-ի կողմից դատարան ներկայացված փաստաթղթերով հաստատվել է, որ նա ունի մինչեւ 3 տարեկան երեխա, որի հիման վրա՝ ընդունվել է համաներման մասին օրենք, համաձայն որի՝ «պատժից ազատվում են առավելագույնը վեց տարի ժամկետով ազատազրկման դատապարտված` օրենքն ուժի մեջ մտնելու օրվա դրությամբ մինչեւ երեք տարեկան երեխա ունեցող անձինք»: Նույն օրը որոշում է կայացվել Ա.Վ.-ի նկատմամբ քրեական հետապնդումը դադարեցնելու եւ գործի վարույթը կարճելու մասին:
ՀՀ քննչական կոմիտեի եւ ՀՀ ոստիկանության համապատասխան ծառայությունների աշխատակիցների կողմից ձեռնարկված համատեղ լայնածավալ միջոցառումների, ինչպես նաեւ կատարված դատագենետիկական փորձաքննություններով պարզվել է, որ համաներում հայտարարելու մասին օրենքը ուժի մեջ մտնելուց 3 օր առաջ՝ 2018թ. հոկտեմբերի 29-ին Քաղաքացիական կացության ակտերի գրանցման Էրեբունի եւ Նուբարաշեն տարածքային բաժնում ստացվել է ամբաստանյալ Ա.Վ.-ի եւ վկա Ի.Դ.-ի՝ ծնողների համատեղ երեխայի հայրության որոշման մասին դիմումը, որով վերջիններս, նախազգուշացված լինելով սուտ տեղեկություններ հայտնելու համար ՀՀ քրեական օրենսգրքի 1691-րդ հոդվածով (քաղաքացիական կացության ակտերի գրանցման մարմիններին սուտ տեղեկություններ հաղորդելը) սահմանված պատասխանատվության մասին, հայտնել են սուտ տեղեկություններ, թե իբրեւ Ա.Վ.-ն հանդիսանում է հիշյալ երեխայի հայրը: Նույն օրը երեխային տրվել է նոր ծննդյան վկայական, որում երեխայի հայր նախկինում նշված անունը փոփոխվել է եւ որպես երեխայի հայր է գրանցվել Ա.Վ.-ն: Այնուհետեւ ծննդյան գրանցման փոփոխված ակտը ներկայացվել է դատարան եւ Ա.Վ.-ի նկատմամբ կայացվել է պատասխանատվությունից ազատելու մասին վերը նշված դատական ակտը:
Որոշում է կայացվել Ա.Վ.-ին ՀՀ քրեական օրենսգրքի 1691-րդ եւ 325-րդ հոդվածի 1-ին մասով որպես մեղադրյալ ներգրավելու մասին, եւ քրեական գործը միացվել է ՀՀ քննչական կոմիտեի հատկապես կարեւոր գործերի քննության գլխավոր վարչության վարույթում քննվող մեկ այլ գործի, որով արդեն իսկ Ա.Վ.-ն ներգրավվել է որպես մեղադրյալ՝ ՀՀ քրեական օրենսգրքի 38-34-104-րդ հոդվածի (սպանության փորձ կազմակերպելը) 2-րդ մասի 6-րդ կետով, 38-131-րդ հոդվածի (մարդու առեւանգում կազմակերպելը) 1-ին մասով, 38-176-րդ հոդվածի (կողոպուտ կազմակերպելը) 3-րդ մասի 1-ին կետով, 182-րդ հոդվածի (շորթում) 3-րդ մասի 2-րդ կետով եւ նրա նկատմամբ խափանման միջոց է ընտրվել կալանավորումը:
Նախաքննությունը շարունակվում է: