«Երբ խոսում եք քաղաքական հետապնդման մասին, այդ որտե՞ղ են տեսել, որ քաղաքական հետապնդման զոհին դատարանը հրաժարվի կալանք տալ»,- այսօր խորհրդարանում նման հարց հնչեցրեց ՀՀ վարչապետ Նիկոլ Փաշինյանը՝ անդրադառնալով ընդդիմադիր քաղաքական ուժերի հայտարարություններին, թե իշխանությունը իրենց նկատմամբ քաղաքական հետապնդում է իրականացնում։
Նա հետաքրքրվեց՝ իսկ իրենց ինչո՞ւ չէին հրաժարվում կալանք տալ. «Վզները կոլորեին հինգ րոպեում։ Սեղանի տակից դուրս չէին գալիս։ Առավոտից երեկո ճամարտակում եք հակակշռող ուժերի և փոխզսպումների մասին։ Էդ հակակշռումն ու փոխզսպումը չորսակնանի տրակտո՞ր է, թե՞՝ հեծանիվ։ Բայց այստեղ կա ուրիշ խնդիր, պետք է հասկանանք՝ այդ դատավորներն ովքեր են»։
Վարչապետը նշեց, որ իրենք հրաժարվում են դատական համակարգի նկատմամբ ապօրինի հսկողությունից, բայց դա չի նշանակում, որ հին ազդեցության համակարգերը պետք է շարունակեն գործել։
«Ոչ, չեն գործելու, թող դրսևորվեն, և ցույց տանք՝ ով ով է։ Մինչ այսօր դատարանների հարցը լուծված չէ, քանի որ մենք չենք ուզել և չենք ուզում խամաճիկային և հին համակարգը փոխարինել խամաճիկային նոր համակարգով։ Մենք ուզում ենք, որ երկրում լինի իրական, անկախ դատարան»,- շեշտեց նա։
Նրա խոսքով, ժողովրդի աչքերին նայող և սուտ խոսող քաղաքական ուժը ՀՀ-ում գործունեություն չի ծավալելու։
«Նրանք, ովքեր կուլիսներից կառավարվել են, այլևս ՀՀ քաղաքական դաշտում տեղ չեն ունենալու։ Թույլ տվեք կանխատեսել՝ հաջորդ խորհրդարանական ընտրություններում տեղ են ունենալու միայն այնպիսի ուժերը, որոնք աներկբայորեն պաշտպանում են 2018 թվականի հեղափոխության արժեքները։ Այսօր այդ ուժերից էլ կան, որ մեզ քննադատում են, և քննադատելու ամենամեծ տեղն իրենք ունեն, և ամենից շատ իրենց քննադատությունից ենք մենք նեղվում։ Իրենք քննադատում են, լավ են անում, ապագան իրենցն է»,- նշեց Ն. Փաշինյանը։
Նրա խոսքով, ապագա իշխանությունն էլ, ընդդիմությունն էլ այն ուժերն են, որոնք կանգնել և ժողովրդին վերադարձրել են իշխանության։
Վարչապետի վստահեցմամբ, դրանից դուրս որևէ մեկն այս խորհրդարանում տեղ չի ունենալու։
«Ես սա ասում եմ որպես ՀՀ քաղաքացի։ Ես ինձ իրավունք եմ վերապահում ասելու, որ մյուսներից մի քիչ ավելի լավ եմ ճանաչում ժողովրդին։ Եթե այդպես չլիներ, մենք այս կազմով այստեղ չէինք գտնվի… Կորոնավիրուսը երկնային մանանայի նման թափվել է նրանց գլխին, և իրենց թվում է՝ քաղաքական բացիլը վերակենդանանալու շանս է ստացել. իրենց թվում է։ Կամ որ սոցիալական բունտից են խոսում… Ուզում եք սոցիալական բո՞ւնտ, հրահրեք, տեսնենք՝ դրա արդյունքում դուք որտե՞ղ և ի՞նչ դիրքով կհայտնվեք»,- նշեց Ն. Փաշինյանը։
Վարչապետը անդրադարձավ այն հայտարարություններին, թե ընդդիմադիր ուժերը կարող են հանրահավաք անել. «Բա որ մե՞նք հանրահավաք անենք, դուք եկել մեզ հանրահավաքո՞վ եք վախեցնում, եկեք մեզ փողով վախեցրեք։ Այ քեզ բան, այստեղ են ասել՝ կանգնեցրեք ինքնաթիռը, իջնող կա»։