Կառավարության որոշմամբ մինչև 2022 թվականը նախատեսվում է Վայոց Ձորի մարզի «Հռիփսիմե» գյուղական բժշկական ամբուլատորիա, «Աղավնաձորի առողջության առաջնային պահպանման կենտրոն», «Արենիի առողջության առաջնային պահպանության կենտրոն», «Մալիշկայի առողջության առաջնային պահպանման կենտրոն» ոչ առևտրային կազմակերպությունները վերակազմակերպել և միացնել «Եղեգնաձորի ԲԿ-ին», որը վերանվանվելու է «Եղեգնաձորի պոլիկլինիկա»: Սա հարուցել է վերը նշված բուժհաստատությունների աշխատողների դժգոհությունը:
«Մալիշկայի առողջության առաջնային պահպանման կենտրոնի» տնօրեն Գայանե Հարությունյանը Tert.am-ի հետ զրույցում ասաց, թե խնդիրն այն, որ խտրական ձևով է սա արվում, որովհետև միայն Վայոց Ձորի մարզն է ընտրվել այս օպտիմալացումների համար:
Նրա խոսքով՝ տարիներ առաջ մարզից տեղեկություն է գնացել կառավարություն, որ ճիշտ կլինի օիպտիմալացնել բուժհաստատությունները և գումարների խնայողություն անել, սակայն Համաշխարհային բանկը դեմ է արտահայտվել, քանի որ ֆինանսներ է ներդրել և այդ ֆինանսների հաշվին է Հայաստանում կայացել ընտանեկան բժիշկների ինստիտուտը։
«Օպտիմալացումներով կառավարությունը ցանկանում է ադմինիստրատիվ մասը՝ տնօրեն, հաշվապահ և տնտեսվար վերացնել: Այդ աշխատավարձերը չեն լինի, մենք, ինչպես խորհրդային տարիներին էր, նորից հետ ենք միանալու Եղեգնաձորի ԲԿ-ին. այսինքն՝ քաղաքային պոլիկլինիկաները պետք է ներառեն հարակից բոլոր գյուղերի բուժական կետերը»,- նշեց նա:
Գայանե Հարությունյանը նաև համաձայն չէ տեսակետի հետ, որ այս կերպ գումարներ կխնայվեն, ինչը պարզաբանում է հետևյալ կերպ. «Հիմա նորից վերամիավորում են, իբր խնայողություն պետք է արվի: Բայց օրինակ, եթե տնտեսվարող չունենանք, ապա Եղեգնաձորից պետք է ծախս արվի խնդրի դեպքում, հասնեն Մալիշկա, կամ Արենի, կամ մեկ այլ համայնք, դա եղա՞վ լրացուցիչ ծախս, տրանսպորտային ծախս և լրացուցիչ տնտեսվար պետք է պահեն, կամ եթե տնօրեն չլինի, մեկը պե՞տք է լինի պատասխանատու, օրինակ՝ վարիչ, տարբերությունը ո՞րն է»,- ասաց նա:
«Մալիշկայի առողջության առաջնային պահպանման կենտրոնի» տնօրենը նշեց, որ այլ խնդիրներ ևս կան: Նրա խոսքով, բնակչության համար իրենց հասանելիությունն ու մատչելիությունը բուժօգնության որակի կարևորագույն սկզբունքներից է, և բնակիչները, օրինակ, գյուղական համայնքների բնակիչները, ուղեգրերի, տեղեկագրերի, քաղվածքների և այլ փաստաթղթերի համար ստիպված չեն հասնել Եղեգնաձորի ԲԿ, որպեսզի այդ փաստաթղթերը կնիքվեն, իսկ օպտիմալացման դեպքում ստիպված են լինելու դա անել:
Հաջորդ խնդիրը, ըստ նրա, կապված է դեղորայքի հետ: Գայանե Հարությունյանը պարզաբանեց, որ պետպատվերով դեղորայքի վրա (որն արտոնյալ և անվճար է տրվում հիվանդներին և դեղատոմսեր են գրվում), պետք է լինի գլխավոր բժիշկների կամ տեղակալների մակագրությունը։ Ըստ նրա՝ այդ դեղատոմսերի պահն էլ է անհասկանալի, և պարզ չէ, թե ինչպես է կարգավորվելու խնդիրը, օրինակ, հաշմանդամներն ինչպե՞ս են ստանալու այդ դեղորայքը:
«Բազմաթիվ անհարմարություններ են առաջանալու բնակիչների համար: Եթե այժմ դեղորայքը դեղատնից անմիջապես բերվում է մեր կենտրոն, ապա վերամիավորման արդյունքում բժիշկը գնալու է դրանք տոպրակով վերցնի, կամ Եղեգնաձորի ԲԿ-ն որոշակի ժամանակահատվածը մեկ ծախս կատարի և բերի հասցնի: Այսինքն՝ նրանք ցանկանում են խնայել գումարներ, սակայն առաջանալու են նոր ծախսեր, որոնք նույնն են լինելու, ինչ ներկա ծախսերն են»,- պարզաբանեց նա:
Գայանե Հարությունյանը նշեց, որ իրենց դժգոհություններն արտահայտել են տարբեր ատյաններում: «Մեր դիրքորոշումն ենք ուղարկել ԱԺ առողջապահության և սոցիալական հարցերի մշտական հանձնաժողով, ընտանեկան բժիշկների գրասենյակներին ենք ուղարկել, որտեղից մեզ ասել են, որ կաջակցեն, ուղերձ ենք մշակել, որը մեր դիրքորոշումների հետ ներկայացնելու ենք կառավարություն: Մենք առողջապահության փոխնախարարների հետ ենք հանդիպել, առողջապահության նախարարության տարբեր մասնագետների մոտ ենք գնացել , իրենք ասացին, որ քննարկվել է հարցը»,- նշեց նա և նկատեց, որ ոչ մի անգամ օպտիմալացվող կենտրոնների տնօրեններին այդ քննարկումներին մասնակից չեն դարձրել:
«Նրանք, հավանաբար, մարզային իշխանություններին են հարցում արել, դե նրանք կողմնակից են, որ լինի միջոցների խնայում, որպեսզի իրենց «ռեյտինգը բարձրանա», որ ասեն՝ տեսեք, այս մարզը խնայողություն է անում, պետության միջոցներ է խնայում: Մեզ հաշվի չեն առել, ասել են՝ դուք չգիտեք, լավ չեք պատկերացնում իրավիճակը: Մենք հիմա Վայոց Ձորով սկսում ենք այս օպտիմալացումը, հետո կանցկացնենք ամբողջ հանրապետությունով մեկ»,- նշեց նա:
Գայանե Հարությունյանն ընդգծեց, որ ընտանեկան բժիշկներ, տարբեր հաստատությունների ղեկավարներ կոնֆերանս են արել, որին այլ բազմաթիվ մարդիկ են մասնակցել, և բոլորն էլ իրենց դժգոհություն են արտահայտել այս որոշման դեմ, որովհետև մրցակցությունն էլ է վերանալու: «Խնդիր կա՞, ուզո՞ւմ են օպտիմալացնել, բարի, թող գան տնօրենների հետ խոսեն, առաջարկենք տնօրենների աշխատավարձը 120 հազարից դարձնեն 70 հազար, բայց մեր կազմակերպաիրավական ձևը թողնեն նույնը»,- շեշտեց նա:
tert.am