«Արմենիա2026» շարժման հիմնադիր Նարեկ Մանուկյանը հանդես է եկել կոչով՝ ուղղված առաջին երեք նախագահներին. «Հայաստանում գրեթե բոլորն են հասկանում, որ եթե 2026 թվականի ընտրություններին ընդդիմադիր դաշտի դրոշակակիրները լինեն նախկին նախագահները կամ նրանց հետ խիստ ասոցացված մարդիկ, ուրեմն կարելի է Նիկոլ Փաշինյանին արդեն շնորհավորել։ Իսկ հարց է ծագում՝ ինչ անեն նրանք, չմասնակցե՞ն ընտրություններին։
Իմ կարծիքով՝ իհարկե , չմասնակցեն, քանի որ Նիկոլը և իր շրջապատը, հասկանալով, որ նախկին նախագահները իրենց երազած ընդդիմությունն են (որի մասին բազմիցս նույնիսկ իրենք են ասել), ամեն գնով փորձելու են ընդդիմության դրոշակակիր դարձնել նրանց։
Սա այն դեպքն է, երբ նրանք իրենց անձնական և կուսակցական շահը պետք է մի կողմ դնեն և առաջնորդվեն ժողովրդի շահով։ Իսկ ժողովրդի և ազգի շահը առաջին հերթին կայանում է նրանում, որ պետք է բացառվի Նիկոլի վերընտրվելը 2026 թվականին։
Այստեղ նաև մեկ ուրիշ հարց է առաջանում. նախկին նախագահների չառաջադրվելու դեպքում նրանց ընտրողների մի մասը կարող է ընդհանրապես չգնալ ընտրության, ինչը ձեռնտու է Նիկոլ Փաշինյանին։ Դրա համար նրանք ընտրություններից ոչ շատ առաջ, ոչ շատ հրապարակային, իրենց ընտրողներին պետք է հորդորեն իրենց ձայնը տալ այդ պահին արդեն սոցհարցումներով անցողիկ շեմը հաղթահարող որևէ ընդդիմադիր ուժի։
Իրենց ընտրություններին չմասնակցելով՝ նրանք ի չիք են դարձնելու նաև Նիկոլի և նրա թիմի գլխավոր հաղթաթուղթը՝ «նախկինների վերադարձ» կոչված թեզը։
Իսկ ես պատասխանատվություն եմ վերցնում ընդդիմադիր դաշտի և ժողովրդի անունից՝ ասելու, որ մենք բոլորս այդ Ձեր քայլը կընդունենք հավուր պատշաճի, իսկ Ձեր կադրային մեծ ռեսուրսը ապագայում մեծ սիրով կօգտագործենք։
Ձեր կողմից ժամանակին և արժանապատիվ կերպով կայացված որոշումը կարող է վճռորոշ դեր խաղալ Հայաստանի ապագայի համար։ Հարգանքով՝ «Արմենիա2026» շարժման հիմնադիր Նարեկ Մանուկյան»: