Մենք պետք է շինարարության ոլորտներում ստանդարտների բարձրացման խնդիրը անընդհատ ունենանք: Այս մասին այսօր Կառավարության հերթական նիստին ասաց ՀՀ վարչապետ Նիկոլ Փաշինյանը:
«Հիմա մենք ասում ենք, պարծենում ենք, հաշվետու ենք լինում, որ այսօր ճանապարհաշինարարության որակը շատ ավելի լավ է, քան երեք տարի առաջ, բայց պետք է արձանագրենք, որ այս որակը, որ այսօր ունենք, մենք այդ որակից ընդհանրապես բավարարված չենք, մենք պետք է անգամներով որակը բարձրացնենք»,-ասաց վարչապետը:
Նա նշեց, որ իհարկե լավ կլինի, որ օտարերկրյա ընկերություններ կան, մրցույթներին մասնակցեն` իրենց հետ բերելով նոր մշակույթ, ստանդարտներ, բայց այս ամեն ինչի արդյունքում պետք է մեր ընկերություններն էլ շինարարություն իրականացնեն այլ երկրերում:
«Ամբողջ փոփոխությունները բերելու են նրան, որ շինարարական ընկերությունների ստանդարտներն է փոխվելու: Մինչև հիմա ՀՀ-ում շինարարության նկատմամբ կա խորհրդային միության ժամանակ «պադրաչիկ» բառի ձևախեղված ձևը՝ «փոդրաչի»: Մեր շինհհրապարակները ցավոք սրտի շատ հաճախ աղբանոցի են նման, քան գործունեություն ծավալողի տեսակի: Մենք պետք է ստանդարտը բարձրացնենք` բանվորի հագուստից, նրա աշխատանքային օրվա և իրավունքների պաշտպանությունից սկսած, մեր նպատակը պետք է լինի բովանդակային փոփոխությունները: Այն երկրում, որտեղ բանվորի նկատմամբ կա քամահրական վերաբերմունք, դա լուրջ բովանդակային պրոբլեմ է»,-ասաց նա:
Տարածքային կառավարման և ենթակառուցվածքների նախարար Սուրեն Պապիկյանը հանուն արդարության նշեց, որ տեխհսկսողության ոլորտում չենք հասել նրան, ինչին ձգտում ենք, և այս ուղղությամբ աշխատանք ունենք դեռ անելու: Նա բարձրացրեց ծանրաքաշ մեքենաների խնդիրը:
«Այդ ծանրաքաշ մեքենաները մեր ճանապարհների որակի վրա էական նշանակություն են ունենում և հատկապես ամռանը, երբ ջերմաստիճանը բարձրանա, կարող ենք բազում խնդիրներ ունենալ»,-ասաց նա: Վարչապետը լուծում համարեց բեռնատարների կշռման կետեր հիմնադրումը: