Այսօր ՛՛Տեսակետ՛՛ մամուլի ակումբում ռազմական փորձագետ Վան Համբարձումյանը մտահոգություն հայտնեց Ադրբեջանի կողմից անցկացվող զորավարժությունների վերաբերյալ, քանի որ, նրա խոսքով, Ադրբեջանը դա կրկին անում է սահմանին մոտ կրակադաշտերում՝ ներգրավելով լուրջ զինատեսակներ:
՛՛Թիկունքից լուրջ ուժեր են մոտենում սահմանին՝ զրահատանկային տեխնիկա և այլն, թիկունքից նոր ուժեր ու նոր ստորաբաժանումներ են մոտենում, սա հենց այնպես չէ: Պատերազմը հենց այնպես ոչ ոք չի սկսում, պետք է թիկունքից քո ողջ ռազմական ուժերը սահմանին մոտ՝ շփման գիծ տեղափոխես, որ ողջ ուժով պատերազմ սկսես, հիմա իրենք հենց այնպես եթե բերեն սահման, հայկական կողմին պարզ կդառնա, որ պատերազմ են սկսում, ես վտանգ եմ տեսնում, որ բավականին լուրջ ուժեր են մոտենում սահմանին՝ զորավարժության անվան տակ՛՛,-ասաց փորձագետը՝ ընդգծելով, որ զորավարժությունն իրական մտադրությունը քողարկելու լավագույն միջոց է:
Համբարձումյանն անդրադարձավ նաև ռուս-ադրբեջանական հարաբերություններին և նշեց, որ երբ անցյալ տարի Ադրբեջանը ցանկանում էր Ռուսաստանից գնել կործանիչներ, ռուսական կողմը չէր վաճառում՝ պատճառաբանելով, թե դրանք կարող են վտանգ ներկայացնել ՌԴ-ի նավատորմի համար Կասպից ծովում: ՛՛Սակայն այս տարի այդ կործանիչները Ռուսաստանը վաճառել է Ադրբեջանին, հետևաբար՝ ինչ-որ բան է տեղի ունեցել, Ադրբեջանի ու Ռուսաստանի հարաբերությունները բարձրացել են ավելի բարձր մակարդակի վրա՛՛,-ասաց նա:
Սա, Համբարձումյանի խոսքով, նշանակում է, որ ՀՀ ռազմական ղեկավարությունը, ԱԳՆ-ն լուրջ մտածելու բան ունեն:
Միևնույն ժամանակ, ինչպես նկատեց բանախոսը, Ռուսաստանի ու Թուրքիայի հարաբերությունները նույնպես լավացել են, ինչը ևս վտանգավոր է Հայաստանի համար: Այս համատեքստում Համբարձումյանը շեշտեց բազմամիլիարդանոց սպառազինության ձեռքբերման պայմանագրերը, Թուրքական հոսքի ծրագիրը և այլն:
՛՛ՀՀ-ի և ՌԴ-ի հարաբերությունները ոչ ամենալավ ժամանակներն են ապրում, իսկ ՌԴ-Ադրբեջան և ՌԴ-Թուրքիա հարաբերությունները մի քանի անգամ ավելի բարձր մակարդակ են տեղափոխվում՛՛,-ամփոփեց նա: