ԱԺ արտահերթ նիստում 86 կողմ, 0 դեմ, 0 ձեռնպահ ձայներով երկրորդ ընթերցմամբ ընդունվեց ԱԺ պատգամավոր Սոֆյա Հովսեփյանի ներկայացրած «Զինվորական ծառայության և Զինծառայողի կարգավիճակի մասին օրենքում լրացում կատարելու մասին օրենքի նախագիծը»։
«Ինչպես գիտեք զինվորական ծառայության և զինծառայողի կարգավիճակի մասին օրենքի 67-րդ հոդվածում լրացումներ է կատարվել՝ ավելացնելով զինծառայողների ծնողների և ամուսինների անվճար կրթության իրավունքը»,- ասաց Սոֆյա Հովսեփյանը։
ԼՀԿ խմբակցության պատգամավոր Գևորգ Գորգիսյանը ողջունեց նախագիծը։ Ասաց, որ ապրիլյան պատերազմից հետո Սոֆյա Հովսեփյանի հետ փորձում էին հասկանալ զոհվածների ընտանիքների խնդիրները։ Հասկացան, որ նրանց օգնություն է տրվել գումարի տեսքով, դրանով իսկ ավելի աղքատացնելով քաղաքացուն.
«Շատ կարևոր է նախաձեռնությունը, որովհետև առաջին հերթին մտածողության և աջակցության փոփոխություն է տեղի ունենում։ Պետությունը քաղաքացուն տալիս է ուսման գործիք, որով քաղաքացին կդառնա ֆինանսապես անկախ»,- ասաց Գորգիսյանը.
Մինչև քվեարկությունը պատգամավոր Ռուստամ Բաքոյանն էլ որոշեց անդրադառնալ Սուրբ Սոֆիայի տաճարին.
«Սուրբ Սոֆիայի տաճարը անվերադարձ անցավ Թուրքիայի տիրապետության տակ։ Մի քանի դար մնալով որպես մզկիթ, 1935 թվականին այն ստանում է թանգարանի կարգավիճակ, հնարավորւթյուն տալով քրիստոնյա աշխարհին հիանալ և այցելել որպես տուրիստներ և տեսնել ճարտարապետական հզոր կառույցը։ Վերջերս Թուրքիայի նախագահը որոշում է տաճարը վերածել մզկիթի, որը մտահոգություն առաջացրեց աշխարհում։ Հայաստանում անհանգստացած են հուշարձանի շուրջ տեղի ունեցող պրոցեսներով ու հույս հայտնում, որ նաև Հայաստանի իշխանությունները այս հարցում հետևողական կլինեն»։