Սեփական զինված ուժերի անզորությունը հստակ գնահատելով՝ Ադրբեջանի իշխանությունները անում են առավելագույնը, որպեսզի Թուրքիան ներգրավվի այս կոնֆլիկտում։ Այս մասին այսօր լրագրողների հետ հանդիպման ժամանակ ասաց ԱԺ «Իմ քայլը» խմբակցության ղեկավար Լիլիթ Մակունցը։
Վերջինս կարծում է, որ Թուրքիան չի գնա նման քայլի և որևէ կերպ կողմ չի հանդիսանա. «Այն դեպքում, երբ խոսքը գնում է Ադրբեջանի ագրեսիայի մասին ՀՀ պետական սահմանների նկատմամբ, Թուրքիայի կողմ դառնալու պարագայում դա ոչ միայն ՀՀ-ում այլև աշխարհում ընկալվելու է ցեղասպանության համատեքստում։ Այն պարագայում, երբ աշխարհի շատ պետություններ ճանաչել են ցեղասպանությունը և հաշվի առնելով նաև այն հագամանքը, որ Թուրքիան արդեն իսկ մի շարք տարածաշրջաններում ներգրավված է որպես կոնֆլիկտի ուղղակի կողմ, Թուրքիայի այս գործողությունները չեն ընկալվելու աշխարհի շատ պետությունների կողմից»,-ասաց Լիլիթ Մակունցը։
Պատգամավորը նշեց, որ Թուրքիայի ներգրավվածության հիմնական շարժառիթը, ըստ վերլուծությունների պայմանավորված է Ադրբեջանի ստահոդ քարոզչությամբ, որով փորձում էին ներկայացնել՝ իբրև Հայաստանը փորձում է գազատար և նավթատար խողովակների նկատմամբ ոտնձգություն իրականացնել։