2020 ընդունելության միասնական քննություններում դրական միավոր ստացած, բուհ չընդունված և նախարարությանը ներկայացրած 2 դիմումները ստորագրած 134 անձանց մեջ եղել են կրկնվող անուններ: Կան դիմորդներ, որոնք թեև ընդունվել են առաջին փուլի արդյունքում, բայց նաև ստորագրել են դիմումները: Այսպիսով, առաջին փուլի արդյունքում դրական միավոր ստացած և բուհ չընդունված բողոքող դիմորդների թիվը 88 Է:
Այս մասին հայտնում են ԿԳՄՍ նախարարության լրատվական ծառայությունից:
Տեղեկացնում են, որ 88-ից լրացուցիչ փուլին մասնակցել է 64 դիմորդ. նրանցից 63-ն ընդունվել է: 88-ից 20-ը չի դիմել լրացուցիչ փուլին, 1 դիմորդ չի ընդունվել, գերազանց միավոր ստացած 6 դիմորդների հանձնաժողովի որոշմամբ առաջարկվել է իրենց դիմում-հայտերի հաջորդ կրթական ծրագրերին համապատասխան լուծումներ. 4-ը համաձայնել են:
Ինչ վերաբերում է դրական միավոր ստացած ու մրցույթից դուրս մնացած և լրացուցիչ մրցույթին չդիմած մյուս դիմորդներին, ապա նրանց որոշ մասն արդեն ընդունվել է այլ բուհեր, մյուսներն էլ կարող են դիմել հեռակա ուսուցման համակարգ։
Հիշեցնենք, Բուհեր չընդունված մի շարք դիմորդներ եւ նրանց ծնողները կրկին ՀՀ կրթության, գիտության, մշակույթի եւ սպորտի նախարարության շենքի առաջ են․ նրանք պահանջում են ԿԳՄՍ նախարար Արայիկ Հարությունյանի հետ հանդիպում, այնուհետ պահանջել են վերջինիս հրաժարականը:
Ավելի ուշ մասնակիցները երթով շարժվել են եւ փակել նախարարության շենքի հարակից փողոցների հատման կետը՝ նստացույց իրականացնելով։ Պահանջատեր դիմորդ շարժման որոշ անդամներ եւ ծնողներից մեկը բերման են ենթարկվել։ Բոլոր բերման ենթարկված անձինք չափահաս են։ ՀՀ ոստիկանության աշխատակիցները շուտով վերականգնել են երթեւեկությունը։