ՀՀ աշխատանքի և սոցիալական հարցերի նախարար Զարուհի Բաթոյանն կառավարության նիստում ներկայացրեց ՀՀ սոցիալական բնակարանային ֆոնդի կացարաններում բնակվող միայնակ կենսաթոշակառուներին սպառած բնական գազի, էլեկտրական էներգիայի և ջրամատակարարման վարձավճարների փոխհատուցման կարգը, ինչպես նաև յուրաքանչյուր տարվա համար փոխհատուցման ենթակա ծախսերի ծավալները սահմանելու մասին որոշումը:
Ըստ նախարարի, որոշման նախագծի ընդունումը բխում է «Հայաստանի Հանրապետությունում սոցիալական բնակարանային ֆոնդի կացարաններում բնակվող միայնակ կենսաթոշակառուներին նպատակային սոցիալական աջակցություն ցուցաբերելու մասին» օրենքից և նպատակ ունի մեղմել սոցիալական բնակարանային ֆոնդի կացարաններում բնակվող միայնակ կենսաթոշակառուների սոցիալական վիճակը:
Զարուհի Բաթոյանը հայտնեց, որ որոշման ընդունմամբ կկարգավորվի սոցիալական բնակարանային ֆոնդի կացարաններում բնակվող միայնակ կենսաթոշակառուներին անկանխիկ եղանակով փոխհատուցում տրամադրելու գործընթացը` նրանց սպառած բնական գազի, էլեկտրական էներգիայի և ջրամատակարարման վարձավճարների դիմաց: Նրա խոսքով, յուրաքանչյուր տարվա համար փոխհատուցման չափը սահմանում է ՀՀ կառավարությունը՝ պայմանավորված շահառուների թվի և ծառայությունների սակագների փոփոխությամբ:
Նախարարը հայտնեց, որ 2020 թվականին յուրաքանչյուր շահառուին տրամադրվող գումարի չափը կազմում է տարեկան 144 հազար դրամ, որն անկանխիկ եղանակով կփոխանցվի բանկ՝ այդ նպատակով բացված հաշվեհամարին:
Շահառուների ցուցակը հաստատելու է ինքը՝ Զարուհի Բաթոյանը՝ հիմք ընդունելով սոցիալական տների պատասխանատուների ուղարկած շահառուների տվյալները: Նախարարի խոսքով, արգելվում է այդ գումարի կանխիկացումը կամ այլ նպատակով օգտագործումը, և եթե թոշակառուն ավելի քիչ ծախսի, քան հատկացված է, ապա մնացորդը կփոխանցվի հաջորդ տարվա բյուջե:
ՀՀ սոցիալական բնակարանային ֆոնդի կացարաններում ներկա դրությամբ բնակվում է ավելի քան 250 անձ, որից 74-ն են միայնակ թոշակառու: