«Ուկրաինան կարծես բարդույթ ունի՝ ընկալելու ԼՂ հակամարտության էությունը, ընկալելու այն լրջագույն սպառնալիքիները, որոնց բախվում է Լեռնային Ղարաբաղի ժողովուրդը, Արցախի Հանրապետությունը, որոնք սպառնում են տարածաշրջանային անվտանգությանը»,- «Շանթ» հեռուստաընկերության «Հեռանկար» հաղորդման ժամանակ հայ-ադրբեջանական պետական սահմանին ռազմական գործողությունների վերաբերյալ Ուկրաինայի արձագանքի մասին հարցին ի պատասխան հայտարարեց ԱԳ նախարար Զոհրաբ Մնացականյանը։
Մնացականյանն ընդգծեց, որ Ուկրաինան կոնֆլիկտները տարանջատելու և ըստ իրենց պատմության, էության գնահատելու է։
«Այս առումով է, որ մենք ունենք անհամաձայնություն»,-հայտարարեց Հայաստանի արտաքին գործերի նախարարը։
Նա նկատեց, որ երկու տարի հետևողականորեն աշխատում են այդ պետության հետ, բարեկամ ժողովրդի հետ որևէ խնդիր չունեն։
«Մենք շարունակելու ենք հետևողականորեն աշխատել՝ տեղ հասցնելու ազդակները և պատգամները։ Բայց անընդունելի ենք համարում և շարունակելու ենք անընդունելի համարել դիրքորոշումներ, որոնք կտրված են իրողությունից։ Սա ոչ տարածաշրջանին, ոչ մեզ, ոչ իրենց որևէ օգուտ չի բերում»,-ասաց ԱԳ նախարարը։
Հիշեցնենք, որ հուլիսի 14-ին ՀԱյաստանի ԱԳՆ է հրավիրվել Հայաստանում Ուկրաինայի դեսպան Իվան Կուլեբան, որին ընդունել է ԱԳ նախարարի տեղակալ Շավարշ Քոչարյանը։ Վերջինը դեսպանին ներկայացրել է ՀՀ ԱԳՆ գնահատականն հայ-ադրբեջանական սահմանային լարվածության վերաբերյալ Ուկրաինայի ԱԳՆ հայտարարության առնչությամբ։
Ուկրաինայի ԱԳՆ-ն հ այտարարության մեջ նշել էր, թե «կողմնակից է իրավիճակի քաղաքական կարգավորմանը՝ Ադրբեջանի Հանրապետության ինքնիշխանության և միջազգայնորեն ճանաչված տարածքային ամբողջականության հիման վրա»։
Հայտարարությունից հետո Երևանում Ուկրաինայի դեսպանատան դիմաց տեղի ունեցավ բողոքի դաշնակցական երիտասարդների բողոքի ակցիան, որի ժամանակ նրանք բորշչով լի տարաներ նետեցին դեսպանատան շենքի ուղղությամբ։