Այսօր ՛՛Տեսակետ՛՛ մամուլի ակումբում հյուրընկալվել էին Փաստաբանների պալատի փաստաբան Մասիս Մելքոնյանը և ՛՛Իրավունքի սահման՛՛ ՍՊԸ տնօրեն Գևորգ Հովհաննիսյանը: Բանախոսներն անդրադարձան Արտաշատի գինու-կոնյակի գործարանի տնօրինության՝ քաղաքացիներին ունեզրկելուն, նրանց ունեցվածքը յուրացնելուն և դրա վերաբերյալ Դատախազության ու Ոստիկանության անգործությանը:
Ինչպես նշեց Մասիս Մելքոնյանը՝ 1990-ականներին ՀՀ-ն որդեգրեց պետական ունեցվածքի մասնավորեցման գործընթացը, բաժնետիրական բիզնեսի վրա հիմնված մշակույթ ձևավորվեց, մարդիկ իրենց ունեցվածքը բաժնետիրական ընկերություններում ներդրեցին՝ հետագա եկամուտ ակնկալելու նպատակով:
Փաստաբանը նշեց, որ Գևորգ Մուրադյանը, որի շահերը ներակայցնում է ինքը, և Գագիկ Մարգարյանը, որի շահերը ներկայացնում է Գևորգ Հովհաննիսյանը, Արտաշատի գինու-կոնյակի գործարանում ներդրել են իրենց գումարը, բաժնետոմսեր են ձեռք բերել՝ ակնկալելով եկամուտ:
՛՛Տարիներ ի վեր այդ գործարանը մինչև 2017-ի սնանկանալը, ունեցել է շահույթներ, սակայն տարիներ շարունակ բաժնետերերը ոչ մի լումա օգուտ իրենց ներդրածի դիմաց չեն ստացել: Մինչև 2018-ը ՀՀ-ում գործել են լրիվ այլ բարքեր, 2018-ից գոնե ներկայացվում է, որ արատավոր բարքերին վերջ է եկել, ՀՀ-ում պիտի արդարադատություն լինի, օրենքի, իրավունքի գերակայություն, և մարդիկ նորից հույս ունեն, որ, դիմելով իրավապահ մարմինների, կունենան օրինական որոշումներ, սակայն փաստը ցույց է տալիս, որ դա այդպես չէ՛՛,-ասաց Մելքոնյանը:
Նրա խոսքով՝ թեև այսօր իշխանությունները հայտարարում են, թե ՀՀ-ում չկա կոռուպցիա, սակայն դա այդպես չէ: ՛՛Ես պաշտոնապես հայտարարում եմ՝ ՀՀ-ում կա կոռուպցիա, կա պաշտոնական թողտվություն, կա ոչ վճռական ոստիկան, ոչ օբյեկտիվ դատախազ՛՛,-ասաց փաստաբանը և հավելեց, որ նրանք գործում են մինչև 2018-ը եղած բարքերի համաձայն:
Մելքոնյանն ասաց, որ քաղաքացիները դիմել են ոստիկանություն՝ սեփականության խախտված իրավունքների վերականգնման համար, սակայն ոստիկաններն անհիմն որոշում են կայացրել՝ մերժելով քաղաքացու դիմումը: ՛՛Ոչ մի ոստիկան իրավունք չունի աչալրջորեն չզբաղվելու քաղաքացու իրավունքների պաշտպանությամբ՛՛,-ասաց փաստաբանը:
Նա հավելեց, որ վերոնշյալ հարցի բարձրաձայնումից հետո նշյալ գործարանից երրորդ անձնավորությունը ևս բարձրաձայնել է իր խնդրի մասին: Այս առնչությամբ Մելքոնյանն ասաց. ՛՛Բավարար հիմքեր ունենք ենթադրելու, որ դա կրել է կազմակերպված բնույթ, ինչին իրավապահ մարմինները պետք է տան գնահատական՛՛:
Նա նշեց նաև, որ իրենք որոշումները բողոքարկել են Գլխավոր դատախազություն ու դատարան և հույս ունեն, որ քաղաքացիների սեփականության իրավունքները կվերականգնվեն, և իրենք կհասնեն արդարության:
Գևորգ Հովհաննիսյանն էլ նշեց, որ սա ազգի խնդիր է, խոսքը հարյուրավոր մարդկանց մասին է, որոնք իրենց գումարները ներդրել են տնտեսության կառավարման ոլորտում, ակնկալել են իրավաչափ եկամուտներ, սակայն կորցրել են ամբողջը:
՛՛Իրավապահ մարմիններից մերժողական գրությամբ մի պատասխան ենք ստացել, մինչդեռ պիտի որոշում կայացվեր, ընդամենը մի գրություն է կազմվել, և մենք կփորձենք պաշտպանել մեր իրավունքները՛՛,-ասաց Հովհաննիսյանը:
Նա նաև հավելեց. ՛՛Կանխամտածված սնանկության տանող հատկանիշներ ենք արձանագրում: Արձանագրում ենք մի փաստ, որ այս գործի քավորները նախկին շատ լուրջ պաշտոնյաներ են՛՛:
Հովհաննիսյանի խոսքով՝ կա հիմնավոր կասկած, որ շարունակաբար վարվում է նույն քաղաքականությունը, ինչը եղել է նախկինում: ՛՛Եթե այդպես չէ, դիմում ենք ձեզ՝ քաղաքական կամք դրսևորեք՝ քննարկելու այս հարցերը՛՛,-դիմելով կառավարությանը՝ ասաց ՛՛Իրավունքի սահման՛՛ ՍՊԸ-ի տնօրենը և ընդգծեց, որ այստեղ 7-8-9 զրոներով թվերի մասին է խոսքը:
Մելքոնյանն էլ ասաց, որ իրավապահ համակարգը իներցիայի ուժով աշխատում է նախկինում ընդունված բարքերով, երբ ոստիկանության աշխատողը պարզապես չի ցանկացել կատարել այն գործողությունը, որը պարտավոր էր:
՛՛Իրավաբանական անձանց պետական ռեգիստրի Արտաշատի գրասենյակից ոստիկանը պարտավոր էր վերցնել փաստաթղթերի փաթեթ, որն ուսումնասիրելով՝ շատ կարևոր փաստեր կգտներ գործի համար, սակայն ոստիկանը միայն զանգել է, հարցրել պատասխանատուին՝ Արտաշատի գինու-կոնյակի գործարանի փաստաթղթերում Գևորգ Մուրադյանի անունով փաստաթուղթ կա՞, նա էլ ասում է՝ չէ, չկա: Տպավորություն է, թե սպասում էր, որ իրեն զանգեն, նման բան հարցնեն: Օրեր անց ես գնացել եմ այդ գրասենյակ, հայտնաբերել կարևոր փաստաթղթեր: 2000 թվականի թղթամատյաններից բնօրինակ կա, որտեղ գրված է, որ առաջին սեփականատերըը Հովիկ Աբրահամյանն է՝ նախկին վարչապետ, երկրորդը՝ Գևորգ Մուրադյանը, ինչն ուղղակիորեն հաստատում է մեր ասածը, բայց ոստիկանության աշխատողը չի արել դա, մարզի դատախազն էլ այնպիսի ոգևորությամբ է նրա չարածը պաշտպանել, կարծես 18-19-րդ դարերում ենք ապրում՛՛,-ասաց Մելքոնյանը:
Խոսելով իրենց քայլերի մասին՝ բանախոսներն ասացին, որ դիմել են գլխավոր դատախազին, որ վերացնի մարզի դատախազի անօրինական որոշումը, դիմել են Առաջին ատյանի դատարան, որպեսզի վերացնեն անօրինական որոշումները, հարուցեն քրգործ, մեղավորներին ի հայտ բերեն և վերականգնեն քաղաքացու սեփականության խախտված իրավունքները:
Մանրամասները՝ տեսանյութում.