NOVATEL ընկերությունը մոտ երկու ամիս առաջ է ստեղծվել, մեր ցանկությունն է՝ ձեռք բերել ՛՛ՎԵՈՆ Արմենիայի՛՛ 100 տոկոս բաժնեմասը: Նպատակն այն է, որ Հայաստանում լինեն զարգացած հեռահաղորդակցություն, մատչելի սակագներ, մրցակցային կապ: Այս մասին այսօր ՛՛Տեսակետ՛՛ ակումբում կայացած մամուլի ասուլիսի ժամանակ ասաց NOVATEL ՍՊԸ-ի գործադիր տնօրեն Մինաս Երզնկյանը:
Նրա խոսքով՝ իրենք ցանկանում են, որպեսզի 4G կապը զարգանա ոչ միայն Երևանում, այլև՝ Հայաստանի այլ քաղաքներում, սահմանային գոտում: Բացի այդ, Երզնկյանի խոսքով, ՛՛ՎԵՈՆ Արմենիան՛՛ միակ ընկերությունն է, որ հնարավորություն ունի առանց մեծ ծախսերի զարգացնել 4G կապը, ինչպես նաև՝ փորձնական, օրինակ՝ բիզնես կենրոններում, բուհերում, գործարկել 5G կապը՝ ցույց տալով դրա առավելությունները: ՛՛Եթե նախորդ սերնդի ցանցերի հետ համեմատենք, 5G ցանցի բազային կայաններն ավելի էժան են և ֆինանսական որևէ խնդիր չեն առաջացնում՛՛,-ասաց NOVATEL-ի գործադիր տնօրենը:
Երզնկյանն անդրադարձավ նաև 5G-ի վնասակարությանը մարդու առողջության ու շրջակա միջավայրի վրա ունեցած ազդեցության առումով և ասաց. ՛՛Ես չեմ հավատում հեքիաթներին, որ 5G-ն վնասակար է: Նա հավելեց, որ շատ բարձր է գնահատում ՛՛ՎԵՈՆ Արմենիա՛՛-ի տեխնիկական ու սպասարկման անձնակազմը և դեմ է կրճատումներին, և գործարքը հաջողությամբ պսակվելու դեպքում անգամ կխրախուսեն աշխատողներին:
Խոսելով գնման ընթացքի մասին՝ Երզնկյանն ասաց. ՛՛Այսպիսի կազմակերպությունների գնման գործընթացը շատ բարդ է, գոյություն ունեն սկզբնական պայմանավորվածություններ, ինչպես նաև՝ գաղտնիության մասին պայմանագիր, աուդիտ, վերջնական առաջարկ, դիմում կարգավորող մարմնին, որից հետո սկսվում է վերջնական փուլը՛՛: Ընկերության գործադիր տնօրենը շեշտեց, որ չեն դիտարկում բաժնետոմսերի մասնակի գնումը, այլ միայն՝ 100 տոկոսը:
Նա նշեց, որ դեռևս չի կարող ասել, թե իրենք որ փուլում են, որովհետև առկա է գաղտնիության մասին պայմանագիր, սակայն ընդգծեց, որ գործընթացն արդեն բավական առաջխաղացում ունի: Երզնկյանն ասաց նաև, որ ՛՛ՎԵՈՆ Արմենիայի՛՛ ձեռքբերմանը մասնակցելու են համաշխարհային համբավ ունեցող ընկերություններ, իսկ NOVATEL ՍՊԸ-ն ստեղծվել է հատուկ ՛՛ՎԵՈՆ Արմենիայի՛՛ ձեռքբերման գործարքին մասնակցելու նպատակով:
Մանրամասները՝ տեսանյութում.