ԱՄՆ պետքարտուղար Մայք Պոմպեոն չի բացառել Բելառուսի նկատմամբ պատժամիջոցների սահմանումը և նավթի մատակարարումների դադարեցումը` պայմանավորված այնտեղ տիրող իրավիճակով, հաղորդում է TASS լրատվական գործակալությունը:
«Ես վստահ եմ, որ մենք կքննարկենք, թե ինչ ենք անելու ոչ միայն միակողմանի, այլև բազմակողմանի պլանով, որպեսզի լավ արդյունքների հասնենք Բելառուսի քաղաքացիների համար՝ լինի դա պատժամիջոցների, թե մատակարարումների տեսքով: Այդ ամենը դեռ պետք է որոշել», – ասել է Պոմպեոն՝ հավելելով, որ հարկավոր է հետևել Բելառուսում իրադարձությունների զարգացմանը:
Պոմպեոն նաև նշել է, որ Բելառուսում տիրող իրավիճակին արձագանքելու հարցում Վաշինգտոնը կհամագործակցի Եվրամիության հետ:
«Մեզ շատ են մտահոգել ընտրությունները և հիասթափեցրել է այն, որ քվեարկությունը չի եղել ազատ և արդար: Մենք նման վարք տեսել էինք նաև նախկինում: Տեղի է ունեցել բռնություն և խաղաղ ցուցարարների նկատմամբ անհարիր վերաբերմունք: Մենք դեռ չենք որոշել մեր վերջնական պատասխանը: Մենք կաշխատենք մեր եվրոպացի գործընկերների հետ, նրանց հետ, ովքեր նույնքան մտահոգված են տեղի ունեցածով», – ասել է ԱՄՆ պետքարտուղարը:
Հիշեցնենք՝ Բելառուսում բողոքի ակցիաներ են սկսվել օգոստոսի 9-ին կայացած նախագահական ընտրություններից հետո, որոնց արդյունքում Լուկաշենկոն 6-րդ անգամ դարձել է նախագահ: