Մենք չունենք որեւէ դատավոր, որը զենքի սպառնալիքով, առավել եւս պետական ծառայողին վնաս կպատճառի կամ կխոչնդոտի նրա ծառայողական պարտականությունների կատարմանը: Այս մասին, այսօր՝ հոկտեմբերի 30-ին, ԱԺ-ում լրագրողների հետ զրույցում նշեց Դատական դեպարտամենտի ղեկավար Կարեն Փոլադյանը՝ անդրադառնալով օրեր առաջ «Առինջ մոլ»-ի մոտ տեղի ունեցած միջադեպին:
«Դեպքի մասին ծանոթացել ենք մամուլից: Ինքս զրուցել եմ դատավորի հետ: Այս պահին չեմ բարձրաձայնի դատավորի մեր խոսացածը, որովհետեւ իմ ունեցած տեղեկություններով հավաքվել են նյութեր, հարուցվել է քրեական գործ: Ընթացքը ցույց կտա, թե ինչ է եղել իրականում»,-ասաց Փոլադյանը:
Ավելի վաղ NEWS.am-ը հայտնել էր, որ հոկտեմբերի 26-ին, արտակարգ դեպք է տեղի ունեցել Կոտայքի մարզում. ահազանգ է ստացվել, որ ժամը 14։38-ի սահմաններում ԱԻՆ փրկարար ծառայության 9-11 խումբը դեպքի վայր գնալիս լուսային փարոսիկները միացրած՝ «Առինջ մոլ»-ի մոտ ճանապարհ է խնդրել Mazda մակնիշի 12 NN 021 համարանիշի ավտոմեքենայի վարորդից, սակայն վարորդը դուրս է եկել ավտոմեքենայից, հարձակվել իրենց մասնագիտական աշխատանքը կատարող փրկարարների վրա և ձեռքին եղած զենքի նմանվող առարկան ուղղել նրանց վրա։ Վարորդն ատրճանակով սպառնացել է, որ «սաղին կսպանի»։
Կոտայքի բաժնի ոստիկանները պարզել են, որ նշված ավտոմեքենան պատկանում է Երևանի բնակչուհի Ն. Ք-ին, և մինչ ոստիկանները կհայտնաբերեին ավտոմեքենան, ժամեր անց ոստիկանության Կոտայքի բաժին է ներկայանում 35-ամյա Արթուր Ավագյանը և հայտնում, որ Mazda մակնիշի ավտոմեքենան վարել է ինքը և այդ միջադեպի ժամանակ իր մոտ եղել է «Բրունի 84» տիպի ատրճանակ, սակայն ինքը որևէ մեկի վրա այն չի ուղղել և ոչ մեկի չի սպառնացել։
Արթուր Ավագյանն աշխատում է ՀՀ վարչական դատարանում՝ որպես դատավոր:
news.am