Այսօր առավոտյան ռուսաստանցի ընդդիմադիր քաղաքական գործիչ Ալեքսեյ Նավալնիին տեղափոխող ինքնաթիռն Օմսկից թռիչք է կատարել Բեռլին:
Ռուսաստանցի բժիշկները դեմ էին նրա տեղափոխմանը, սակայն հետո փոխեցին իրենց կարծիքը: Քաղաքական մեկնաբանները կասկածում են, որ իշխանությունները ցանկացել են թաքցնել թունավորման հետքերը, իսկ Օմսկի բժիշկներն էլ իրենց հերթին ամբողջովին բացառում են այն վարկածը, որ Նավալնին թունավորվել է:
Bombardier Challenger 604 հատուկ ինքնաթիռը, որը հարմարեցված է կոմայի մեջ գտնվող հիվանդների տեղափոխման համար, Մոսկվայի ժամանակով առավոտյան ժ.5:00-ին Օմսկի օդանավակայանից դուրս է եկել: Նավալնիին օդանավակայան են տարել ոստիկանության ուղեկցությամբ:
Ինքնաթիռը վայրէջք է կատարել Շենեֆելդի օդանավակայանում: Նավալնին տեղափոխվել է Բեռլինի Charite կլինիկա: Նրան ուղեկցում է կինը՝ Յուլիա Նավալնայան:
Նավալնիի համակիրները դիմել էին Մարդու իրավունքների եվրոպական դատարան (ՄԻԵԴ) ՝ պարտավորեցնելու Ռուսաստանի իշխանություններին՝ ընդդիմադիր գործչին տեղափոխման թույլտվություն տրամադրել: Դատարանը հրատապ կարգով բավարարել էր միջնորդությունը: Բացի այդ, Նավալնիի կինը պաշտոնական նամակ էր հղել ՌԴ նախագահ Վլադիմիր Պուտինին՝ խնդրելով թույլատրել ամուսնու տեղափոխումը Գերմանիա: