՛՛Տեսակետ՛՛ մամուլի ակումբում օգոստոսի 24-ին հյուրընկալվել էին շեյխ Տահար Բրոյանը, ՛՛Քուրդիստան՛՛ կոմիտեի նախագահ Սլո Դրբոյանը և ՛՛Զագրոս՛՛ քրդական պաշտոնաթերթի պատասխանատու խմբագիր Լիաննա Մհոյանը:
Բանախոսների մտահոգությունը վերջին շրջանում Ազիզ Թամոյանի և Քյարամ Սլոյանի հայտարարություններն էին այն մասին, որ Հայաստանում քուրդ չկա, և իբր որոշ կազմակերպություններ եզդիներին քրդացնում են:
Այս առնչությամբ Լիաննա Մհոյանն ասաց, որ վերջիններիս մատնանշած եզդիները և քրդերը խոսում են քրդերեն կուրմանջի բարբառով՝ առանց որևէ տարբերության, և նրանց միջև կա ընդամենը կրոնական տարբերություն:
՛՛Լեզվի առումով քրդացում չկա, իսկ եզդիները դարեր շարունակ պաշտպանել են իրենց կրոնը՝ եզիդիզմը՝ կրոնի հենքի վրա մշտապես ենթարկվելով ցեղասպանության: Բայց, հուրախություն ազգակիցներիս, պահպանել են այն: Այստեղ նույնպես քրդացման հարց չկա, դա նույնպես չի համապատասխանում իրականությանը՛՛:
Նա նաև թվային տվյալներ ներկայացրեց՝ նշելով, որ Չկալովկա գյուղում ապրում է 40 ընտանիք, Աբովյան քաղաքում՝ 40 ընտանիք, Դիլիջանում՝ 18 ընտանիք, Իջևանում՝ 4 ընտանիք, Սեմյոնովկայում՝ 4 ընտանիք:
՛՛Այսպիսով, եթե հաշվենք՝ 90 ընտանիք՝ բաղկացած միջին թվագրությամբ 5 հոգուց, ընդհանուր թվաքանակը կկազմի 440 հոգի:
Խոսքս վերաբերում է մահմեդականացված քրդերին, որոնցից որոշակի հատվածը կրոնափոխ է եղել՝ ընդունելով քրիստոնեություն՛՛,-ասաց Մհոյանը:
Բացի այդ, նրա խոսքով, այժմ Հայաստանում կա շուրջ 350 քուրդ ուսանող:
՛՛Վիճակագրական տվյալներով՝ Հայաստանում կան 2000-ից ավելի եզդի-քրդեր: Եվ ոչ ոք իրավունք չունի ինքն իր անունից հայտարարություն տարածել և ասել, որ Հայաստանում գոյություն չունեն դավանանքով եզդի քրդեր:
Մեր ընդդիմադիրների չգիտակցված և չիրազեկված խոսակցությունների արդյունքում մեզ մոտ լինում են բազմաթիվ հեռախոսազանգեր և այցելություններ, որոնց հիմնական պատճառը տվյալ մարդկանց կողմից արվող չհիմնավորված հայարարություններն են:
Ի դեպ՝ ասեմ, որ եզիդիզմը կարող են դավանել միայն ազգությամբ քրդերը: Խնդրում եմ իրավական գնահատական տալ ինքնակոչ տիտղոսներով ներկայացվող անձանց գործունեությանը:
Հարգելի՛ ընդդիմախոսներ, մենք երբևէ չենք խառնվել ձեր դավանած կրոնի հիմնահարցերին և որևէ հայտարարություն չենք արել: Ակնկալում ենք, որ այսուհետ դուք ևս կդրսևորեք նման մոտեցում՛՛,-նշեց նա
Շեյխ Տահար Բրոյանն էլ հավելեց. ՛՛Իմ նախապապերը մեր կրոնը պաշտպանել են սրբությամբ, հիմա էլ պահպանվում է մեր նիստուկացը: Հայաստանում կան մարդիկ, որոնք ասում են՝ PKK-ի անդամները եկել են այստեղ ու եզդիներին սարքում են մուսուլման: Մուսուլմանները նրանք են, ովքեր մեզ ասում են մուսուլման: Նրա խոսքով՝ եզդիները նույն քրդերն են, քրդերն էլ՝ նույն եզդիները:
՛՛28-րդ անգամ մեր ժողովուրդը դուրս է գալիս պայքարի՝ ազաըագրվելու համար: Թուրքերը, մեր համընդհանուր թշնամիները, օգտագործում են մարդկանց որպես ձեռքի զենք, որ ժողովուրդը մի գաղափարախոսության շուրջ չհամախմբվի, որ պառակտում լինի՛՛-նշեց ասուլիսի բանախոսներից Սլո Դրբոյանը:
Նա նաև ամոթալի համարեց այն, որ ՔԲԿ-ին համարում են ահաբեկչական կազմակերպություն՝ հավելելով, որ այսօր իրենց ժողովուրդը բարդ ուղի է անցնում, և ամենաճիշտ ճանապարհը Թուրքիայի ժողովրդավարացումն է:
Վերադառնալով էթնիկ ու դավանաբանական թեմաների շուրջ հարցերին՝ Լիաննա Մհոյանը նշեց. ՛՛Մենք քուրդ ենք, կրոնական պատկանելությամբ՝ եզդի՛՛: