Լույս է տեսել Արցախի հերոս Արմենակ Ուրֆանյանին նվիրված ՛՛Բանակի տղան՛՛ գիրքը, որին էլ այսօր նվիրված էր ՛՛Տեսակետ՛՛ մամուլի ակումբում կայացած ասուլիսը:
Գրքի հեղինակ, ՛՛Վարդանանք՛՛ թերթի խմբագիր Վովա Արզումանյանն ասաց, որ ասուլիսին պիտի ներկա լիներ նաև Արմենակ Ուրֆանյանի մայրը՝ տիկին Համեստ Ուրֆանյանը, սակայն սեպտեմբերի 5-ին Ուրֆանյանի գերեզմանաքարի պղծմանն առնչվող լուրերը նրա վրա այնպիսի բացասական ազդեցություն ունեցան, որ նա այսօր վատառողջ է ու չկարողացավ ներկայանալ:
Ինչպես հայտնի է՝ ոստիկանությունից նշել էին, որ հերոսների գերեզմանաքարերի վրա մոմավառության հետքեր են, սակայն Վովան ասաց, որ տիկին Համեստի հետ այցելել է, անձամ տեսել, որ դրանք մոմի հետքեր չեն: ՛՛Մեքենայի յուղի հոտ էր գալիս, դա տիկին Համեստի վրա վատ անդրադարձավ՛՛,-նշեց Արզումանյանը:
Հեղինակն անդրադարձավ գրքի անվանման ընտրությանը և ասաց, որ Ուրֆանյանը մորն ասել էր. ՛՛ Մամ, ես էլ քո տղեն չեմ, ես բանակի տղեն եմ՛՛: Այստեղից էլ՝ գրքի անվանումը:
՛՛2016-ի ապրիլից ունեմ հուշեր Արմենակի հետ կապված, նա երբ զոհվեց, դարձավ հայրենասիրության չափանիշ, ես հերսներին չեմ տարանջատում, բայց նա ինձ համար մի ուրիշ հերոս դարձավ՛՛,-ասաց Վովան՝ հավելելով, որ գրքում տեղ են գտել հուշեր Արմենակի մասին, հարցազրույցներ հրամանատարական կազմի, նրա մարտական ընկերների հետ:
՛՛Այս գիրքը գրել եմ գիշերը ժամը 12-ից հետո, երբ այցելում էինք դիրքեր կամ զրուցում ընկերների հետ, կարծես Արմենակը ներկա լիներ: Հենց գիրքը լույս տեսնելու հաջորդ օրը Արմենակը իմ երազում հայտնվեց ժպիտով, այդ ամբոջ օրը չէի կարողանում խոսել ոչ ոքի հետ, նա կարծես ուրախացել էր, և ես հասկացա, որ հասել եմ իմ նպատակին՛՛,-պատմեց Արզումանյանը:
Նա տեղեկացրեց, որ հունվարի 28-ին՝ Արմենակի ծննդյան օրը, մեծ միջոցառմամբ կլինի գրքի շնորհանդեսը:
Վովան ասաց, որ տիկին Համեստի հետ այցելել է լեգենդար 116 մարտական դիրք, որտեղ զոհվել են մեր հերոսները: ՛՛Մեր զինվորերն ամենաուժեղն են, նրանց հաղթել չի լինի՛՛,-նշեց երիտասարդը:
Նրա խոսքով՝ ինքը նախ իր համար է բացահայտել Արմենակին, այնուհետև՝ ներկայացրել հերոսի կերպարն իր ընթերցողներին: ՛՛Ընկերները պատմում են, որ մեկն արձակուրդ էր գնում, Արմենակն անվերադարձ գումար էր տալիս, իրեն այնպես էր պահում, ասես ինքն էր պարտք ուրիշներին: Հրամանատարներն ասում են՝ նա ամենաանկեղծ կապիտանն էր, իր զինվորներին ասում էր՝ ինչ լինում է, ինձ պատմեք, որ հետագայում հասկանանք՝ ինչ անել, որ խնդիրների մեջ չհայտնվենք: Նա իր կյանքը չխնայեց, մարտը վարեց ընկերների հետ, մինչև վերջին պահն էլ հրամանատարական կազմի հետ կապի մեջ էր՛՛,-պատմեց Վովան:
Նա ասաց նաև, որ ապրիլի մեկին՝ զոհվելուց առաջ, Արմենակը զանգահարել է մորը, ու քանի որ դա Կատակի օրն էր, որոշել է հումոր անել: Արմենակն ասել էր. ՛՛Մամ, ՛՛չեպե՛՛ եմ արել, ինձ զորացրում են՛՛:
Կատակը նրա համար ճակատագրական եղավ: ՛՛Կյանքը նրան բանակից զորացրեց՛՛,-ասաց Արզումանյանը:
Նա նշեց նաև, որ, լինելով ՛՛Վարդանանք՛՛ թերթի գլխավոր խմբագիր, հաճախ է շփվում Արցախի երիտասարդների հետ: ՛՛Արցախի երիտասարդությունը չի երազում խաղաղություն, այլ խաղաղություն է ստեղծում, ամեն կերպ հայրենիքի կողքին է, ծնված է հայրենիքի համար, մեր 18-20 տարեկան տղաներն ապացուցեցին, որ հայն իր լիարժեք ապրելու իրավունքն ունի, երբեք ու ոչ ոք չպետք է հային զրկի իր ապրելու իրավունքից՛՛:
18-ամյա Վովան հավելեց. ՛՛Ամեն հայի պարտքն է, որ ծառայի բանակում, ես լիովին պատրաստ եմ իմ ներուժը դնել բանակում ծառայելու գործում՛՛:
Նա նշեց, որ ընտրել է լրագրողի մասնագիտությունը, բացի գրքեր ու հոդվածներ գրելուց՝ նաև ասմունքում է արցախյան բարբառով: ՛՛Բարբառները պետք է սրբությամբ պահել, ոմանք ամաչում են, իսկ ես հակադարձում եմ՛՛,-ասաց նա:
Վերադառնալով բանակի մասին թեմային՝ Վովան ասաց. ՛՛Եթե համախմբված լինենք, միաբան լինենք, կհաղթենք, հայը երբեք նահանջել ու ընկրկել չգիտի: Բանակը մեր կյանքի երաշխավորն է՛՛:
Մանրամասները՝ տեսանյութում.