Ապրիլյան պատերազմի հերոս Արմենակ Ուրֆանյանի մայրը՝ Համեստ Ուրֆանյանն այսօր պետք է ասուլիսով հանդես գար, սակայն Եռաբլուրում՝ Արցախի հերոսների՝ Ռոբերտ Աբաջյանի և Արմենակ Ուրֆանյանի շիրմաքարերի պղծումից հետո նրա վատառաողջ է։
Հիշեցնենք՝ ոստիկանությունը հետաքննության նախնական տվյալներով հայտարարել էր, թե շիրմաքարերի վրայի հետքերը մոմավառության հետևանքներ էին։
«Այդ օրն առավոտյան տիկին Համեստը գնացել էր Եռաբլուր և քարերից ոչ թե մոմի այլ մեքենայի յուղի հետ էր գալիս, սակայն ինչ-ինչ պատճառներով դա հերքվեց, որն անդրադարձավ տիկին Համեստի վրա և այսօր նա վատառողջ է»,- ասուլիսի ժամանակ հայտարարեց Արմենակ Ուրֆանյանին նվիրված գրքի հեղինակ Վովա Արզումանյանը։
Ոստիկանության հրապարակած վարկածը հերքել էր նաեւ ՀՅԴ Հայ երիտասարդական միությունը։
«Ոստիկանությունը, առանց պատշաճ քննություն անցկացնելու, հապշտապ հաղորդագրություն է տարածել, որում նշվում է, որ շիրմաքարերին հայտնված հետքերը նախօրեին մեր կազմակերպած մոմավառության արդյունք են։
Մինչդեռ նկարներից պարզ երևում է, որ մեր կողմից իրականացված մոմավառության ընթացքում մոմերը՝ հատուկ տարրաներով դրված են միանգամայն այլ վայրում, իսկ հետքերը հայտնվել են հերոսների դեմքերին։
Հիշեցնենք նաև, որ նույնանման դեպք տեղի էր ունեցել նաև անցած տարի, որից հետո մենք պատրաստակամություն էինք հայտնել Եռաբլուրում՝ անհրաժեշտության դեպքում, սահմանել հսկողություն։
ՀՅԴ ՀԵՄ-ը տարիներ շարունակ, պարբերաբար Եռաբլուրում իրականացնում է մոմավառություններ, որոնց արդյունքում երբեք որևէ նման խնդիր չի առաջացել։ Մենք՝ քաջ գիտակցելով վայրի արժեքը, չափազնց զգուշավոր ենք Եռաբլուրում անցկացվող մեր բոլոր միջոցառումների ժամանակ»,- հայտարարել էր ՀԵՄ-ը։