Հայաստանի ազգային արխիվի տնօրեն Ամատունի Վիրաբյանն արդարադատության նախարար Ռուստամ Բադասյանի հրամանով ազատվել է աշխատանքից: Այս մասին ՛՛Տեսակետ՛՛ ակումբում կայացած ասուլիսի ժամանակ ասաց Վիրաբյանը՝ նշելով, որ ինքն ավելի քան 19 տարի ղեկավարել է Հայաստանի ազգային արխիվը եւ երբեք չի մտածել, որ հավերժ է ղեկավարելու:
Նա, մասնավորապես, նշեց. ՛՛Ես ինձ համար օր էի ընտել արխիվի տնօրենի պաշտոնից պատվով հեռանալու համար, դա կամ այս տարվա նոյեմբերի 27-ն էր, երբ լրանում էր իմ պայմանագիրը, կամ հաջորդ տարվա օգոստոսի 17-ը, երբ իմ 65-ամյակը կլրանար, եթե երկարեցնեին պայմանագիրը, քանի որ օրենքը դա թույլ է տալիս: Բայց սեպտեմբերի 7-ին արդարադատության նախարարը հրաման է արձակել, որով ինձ ՊՈԱԿ-ի մասին օրենքի 16-րդ հոդվածի 3-րդ կետի ԺԲ ենթակետով ազատել է աշխատանքից՛՛:
Վիրաբյանը մանրամասնեց, թե ինչ է ենթադրում նշյալ կետը. ՛՛Ի՞նչ է նշանակում այդ ենթակետը` պետական կազմակերպության կողմից վճարման ենթակա հարկերը կամ պարտադիր այլ վճարներ իր մեղքով սահմանված հաշվետու ժամկետի հետ հաշվետու ժամանակաշրջանում չի վճարել: Եթե այս տրամաբանությանը հետեւենք, մինչեւ 2019 թ. աշխատած բոլոր ՊՈԱԿ-ների տնօրենները պետք է հեռացվեին՛՛:
Ազգային արխիվի արդեն նախկին տնօրենը պարզաբանեց, թե օրենսդրական ինչ բացի եւ տեխնիկական ինչ խնդիրների պատճառով է առաջացել այս խառնաշփոթը, որը, սակայն, հետագայում հարթվել է, քանի որ իր պատճառով չէ եղել:
՛՛Քրեական գործ չի հարուցվել, նյութեր են նախապատրաստվել, վճարումը կատարելուց հետո հարցը փակվել է: Եթե օրենքի տրամաբանությանը նայենք` նույն օրենքի 5-րդ կետում ասվում է. «Սույն հոդվածի 3-րդ կետի Բ, Գ, Ը, Թ, Ժ, ԺԲ և ԺԳ ենթակետերով նախատեսված դեպքերում գործադիր մարմնի պաշտոնում նշանակված կամ ընտրության արդյունքում գործադիր մարմնի պաշտոնում նշանակված անձի լիազորությունները դադարեցվում են` համապատասխան իրադարձությունը տեղի ունենալու կամ համապատասխան որոշումը, վճիռը կամ դատավճիռն ուժի մեջ մտնելու հաջորդող օրը՛՛,-պարզաբանեց Վիրաբյանը:
Նա նաև հավելեց. ՛՛Այդ իրադարձությունը 2018-ի օգոստոսին է եղել, այդ տրամաբանությամբ պետք է Պապիկյանն ինձ աշխատանքից ազատեր, բայց չի ազատել, ընդհակառակը, դիմել է կառավարությանը, որ այդ գումարները տան: Եվ երկու տարի հետո հանկարծ հիշել են այս կետի մասին: Ես ենթադրում եմ, որ արդարադատության նախարարությունն ուղղակի չի տիրապետում օրենսդրությանը կամ շտապել է: Այսինքն` այս հրամանը հակասում է ՀՀ օրենսդրությանը՛՛:
Անդրադառնալով արդարադատության նախարարության մամուլի քարտուղարի ֆեյսբուքյան գրառմանը՝ Վիրաբյանն ասաց. ՛՛Նա լուր էր տարածել, որ շահութահարկ չվճարելու համար են ինձ ազատել աշխատանքից, դրա համար կխնդրենք, որ գլխավոր հաշվապահը ներկայացնի, թե ինչի մասին է խոսքը՛՛:
Ասուլիսին ներկա էր նաև Ազգային արխիվի գլխավոր հաշվապահ Վահագն Աբիսողոմյանը: Արդեն 17 տարի է, ինչ նա վարում է Հայաստանի ազգային արխիվի հաշվապահությունը:
Հաշվապահի խոսքով՝ նախարարի հրամանի հիմքում դրված է վերահսկողական ծառայության պետ Դավիթ Գասպարյանի զեկուցագիրը:
Խոսելով խնդրահարույց 26 մլն դրամ շահութահարկի մասին՝ նա ասաց. ՛՛Դա հասկանալու համար նախ պետք է ստուգման ակտը կարդալ, մինչդեռ ես տպավորություն ունեմ, որ որեւէ մեկը ստուգման ակտը չի կարդացել՛՛:
Ըստ Աբիսողոմոնյանի՝ կառավարության բոլոր որոշումներն իրենց հիմքում ունեն ամփոփաթերթեր, որտեղ նշվում են բոլոր շահագրգիռ նախարարությունների առաջարկները, եզրակացությունը: Շահութահարկի հարցը բարձրացրել է նաեւ ֆինանսների նախարարությունը:
Հաշվապահը պարզաբանեց, թե որտեղից է առաջացել շահութահարկը և, հղում անելով ամփոփաթերթին, նշեց, որ Արդարադատության նախարարությունը եւ ՊԵԿ-ը առարկություն չեն ունեցել:
Նա վստահեցրեց, որ երեք տարի յոթ ամիս ստուգվել են ԱԱՀ-ն եւ եկամտահարկը, եւ այդ ընթացքում իրենց խախտումը կազմել է 186000 դրամ, որը հաշվապահական սխալի արդյունք է եղել, ակտում առանձնացված է:
Տեսակետ ակումբում հյուրընկալվել էր նաև Ամատունի Վիրաբյանի շահերը ներկայացնող փաստաբան Տիգրան Գրիգորյանը:
Անդրադառնալով Ռուստամ Բադասյանի հրամանին՝ նա ասաց. ՛՛Նյութերն ուսումնասիրելիս ինձ մոտ տպավորություն է, որ կամ արդարադատության նախարարն ամբողջական չի ուսումնասիրել նյութերը, կամ իրեն սխալ են զեկուցել՛՛:
Ըստ Գրիգորյանի՝ Բադասյանը, չունենալով իրավասություն նախկին գործողությունների համար, կայացրել է ոչ իրավաչափ հրաման, որով նման պատվավոր աշխատողին ազատել են աշխատանքից:
Ամատունի Վիրաբյանն ասաց նաև, որ իրեն դեռ մեկ ամիս առաջ են ՛՛խորհուրդ տվել՛՛ հեռացման դիմում գրել` հասկացնելով, որ հակառակ դեպքում կարող են որոշակի հետեւանքներ լինել: Նա նշեց, որ չի բացառվում, որ աշխատանքից իր հեռացումը պայմանավորված լինի քաղաքական որոշմամբ:
Փաստաբանն էլ վստահեցրեց, որ հրամանը վիճարկելու են դատական կարգով:
Մանրամասները՝ տեսանյութում.