Գերմանիայի դաշնային հետախուզական ծառայութան ղեկավար Բրունո Կալը փակ նիստերից մեկի ժամանակ պնդել է, որ ռուս ընդդիմադիր գործիչ Ալեքսեյ Նավալնին ենթարկվել է «Նովիչոկ»-ի ավելի կոշտ տարբերակի ազդեցությանը:
Ինչպես նշում է ՏԱՍՍ-ը, այս մասին գրում է Spiegel հանդեսը՝ հիշեցնելով, որ Նավալնին, գերմանական կողմի վարկածով, թունավորվել է «Նովիչոկ» խմբի նյութով:
Բացի այդ, աղբյուրը նշում է, որ Քիմիական զենքի արգելման կազմակերպության պատվիրակությունն այցելել է բեռլինյան Charite կլինիկա և ստացել Նավալնիի անալիզները:
Կազմակերպության պատվիրակությանը հետագա հետազոտությունների նպատակով տրամադրվել են Նավալնիի մեզի և արյան անալիզները:
Հիշեցնենք, որ Նավալնիի ինքնազգացողությունը կտրուկ վատացել էր օգոստոսի 20-ին Տոմսկից Մոսկվա թռչելիս: Նրան տեղափոխող ինքնաթիռն արտակարգ վայրէջք էր կատարել Օմսկ քաղաքում, ուր նրան հոսպիտալացրել են շտապ օգնության թիվ մեկ հիվանդանոց: Հիվանդանոցի մասնագետները Նավալնիի օրգանիզմում թույնի հետքեր չէին հայտնաբերել: Ըստ նրանց՝ հետազոտությունները միայն ալկոհոլի և կոֆեինի հետքեր են ցույց տվել: Հայտնի է, որ չվերթից առաջ Նավալնին թեյ է ըմպել օդանավակայանի սրճարանում: