Նիկոլ Փաշինյանը պարտավոր է ուղիղ նայել ժողովրդի աչքերին, ում աչքերին հեղափոխության օրերին նայում և քայլել էր պահանջում, քայլել էր խնդրում, ժողովրդի անունից էր խոսում։ Այս մասին կառավարության դիմաց ասաց «Ոչ վարկային թալանին» նախաձեռնության ղեկավար Մանուել Մանուկյանը։
«Եթե Նիկոլ Փաշինյանն անգամ վախենում է և իր առանձնատնից կիլոմետրից ավելի հեռու է ոստիկանների պատը կանգնեցնում, թույլ չի տալիս մեզ մոտենալ և մեր խնդիրը ներկայացնել, մենք կառավարության շենքի մոտ թույլ չենք տա նրան հեռանալ այստեղից, քանի դեռ չի հանդիպել և ուղիղ չի նայել ժողովրդի աչքերին»,- նշեց Մանուկյանը՝ հավելելով, որ նախաձեռնությունն ունի 5 կարևոր կետ, որոնց հասնելու են անկախ ամեն ինչից։
Մանուկյանը հայտարարեց, որ իրենց պայքարն անշահախնդիր է։ Ոստիկանության ծառայողները մոտեցան Մանուկյանին՝ նշելով, որ վերջինս դիմակը սխալ է դնում, իսկ Մանուկյանն էլ նշեց, որ ոստիկաններն արձանագրություն կազմեն, բայց վճարելու է վարչապետը։ Վերջինս հայտարարեց, որ գումար ինքը չի վճարելու։
«Եթե ես այս ընթացքում որևէ ոստիկանի դիմակը քթից ներքև տեսնեմ ու դուք արձանագրություն չկազմեք, ձեզ պետք է ենթարկեն պատասխանատվության »,-ասաց Մանուկյանը, ապա հայտարարեց. «Արձանագրենք, որ իրենք կոնկրետ հրամանով աշխատում են մեր դեմ, որովհետև վարչապետ Փաշինյանը փախուստի է դիմելու և չի ուզենալու նայել մեր աչքերին։ Նրանք հրաման ունեն՝ մինչև վարչապետի այստեղից դուրս գալը մեզ բերման ենթարկեն »։