«Միանգամայն հաստատում եմ վարչապետի կողմից հնչեցված վիճակագրական տվյալները, դրանք տրամադրվել են ՊԵԿ-ի կողմից։ 2020 թվականի հուլիսին ՀՀ-ում 0-ից բարձր վարձատրվող աշխատատեղերի քանակը կազմել է՝ 613 հազարից ավելին և նախորդ տարվա համեմատ ավել է 6600-ով»,- այս մասին ԱԺ ամբիոնից հայտարարեց ՊԵԿ նախագահ Էդվարդ Հովհաննիսյանը։ Նա նաև հաստատեց, թե համավարակի հետևանքով փակված 70․000 աշխատատեղերը վերականգնվել են։
Վերջինս հիշեցրեց, որ եկամտային հարկի հաշվարկների համար նախատեսված հաշվետու ժամանակաշրջանը յուրաքանչյուր ամիսն է, որի վերաբերյալ մինչև հաջորդող ամսվա 20-ը հաշվետվությունների ներկայացման վերջնաժամկետն է։
«Տնտեսավարողները մինչև ամսի 20-հարկային մարմին ներկայացնում են էլեկտրոնային եկամտային հարկի վերաբերյալ հաշվարկներ և դրանցում արտացոլում իրենց մոտ գրանցված վարձու աշխատողների թվաքանակի և վճարված եկամուտների չափը։ Ըստ դրա՝ ծրագիրն ինքնաշխատ ներկայացնում է տվյալները և հաջորդ օրը ՝ 21-ին ունենում ենք նախորդող ամսվա ընթացքում Հանրապետությունում գրանցված տվյալներ։ Մենք ունենք հուլիս ամսվա տվյալները, որը ներկայացրեցինք օգոստոսին», – եզրափակեց Հովհաննիսյանը։