Եթե Արցախյան հերոսամարտում միասնություն չլիներ, մենք չէինք ունենա պետականություն, անկախություն: Եռաբլուրում լրագրողների հետ զրույցում այս մասին ասաց ԵԿՄ նախագահ, «Իմ քայլը» խմբակցության պատգամավոր Սասուն Միքայելյանը:
«Առաջին Հանրապետության ժամանակ մենք կորցրինք, չկարողացանք ձևավորել երկիր, պետություն, պետականություն և կորցրինք Արևմտյան Հայաստանը: Եվ այսօր մեր գերնպատակը՝ իմ, երկապահների, ազատամարտիկների, Եռաբլուրը սրբորեն պահելն է, որը հիմքն է մեր անկախության, մեր պետականության»,- ասաց նա:
Ըստ նրա՝ պետք է հարգել Երկրապահի գործը, չի կարելի մի քանի մարդու արած գործով ԵԿՄ-ն ջնջել: «Երկրապահն իր մեծ դերակատարությունն է ունեցել Արցախյան հերոսամարտում»,- ասաց նա, ապա նշեց, որ Երկրապահների միությունը միշտ պետք է պատրաստ լինի ՀՀ-ի կողքին որպես ռեզերվ:
Հայտնելով իր կարծիքն աշխարհազորի ստեղծման անհրաժեշտության մասին, թե արդյոք դրա ստեղծումով ԵԿՄ-ն կմղվի երկրորդ պլան՝ Սասուն Միքայելյանը նշեց, որ պատերազմում երկրորդ պլան չկա, կա առաջին գիծ, և պատերազմում բոլորն են հաղթում:
«Աշխարհազորը եԿՄ-ի հետ ընդհանրապես կապ էլ չունի: Աշխարհազորը լուրջ կառույց պետք է լինի, ԵԿՄ-ն հենց աշխարհազորի հիման վրա է ձևավորվել: Վազգեն Սարգսյանը տարբեր կուսակցությունների ենթակայության տակ գտնվող ջոկատները բերեց այն գաղափարին, որ մենք, բանակ չունենալով, պետք է կարողանանք հաղթել: Եվ կարողացավ, իրեն հաջողվեց»,- ասաց նա՝ նշելով, որ Երկրապահը երբեք աշխարհազորին չի խանգարի, աշխարհազորն էլ Երկրապահին չի խանգարի: