Պետք է դաստիարակել հայրենասեր երեխաներ, իսկ հայրենասիրությունը սկսվում է օրորոցից: Այս մասին այսօր Tesaket.info-ի հարցին, թե ինչ է պետք է անել՝ արժանի լինելու անկախությանը, ՛՛Տեսակետ՛՛ ակումբում Անկախության օրվա առթիվ հրավիրված ասուլիսի ժամանակ պատասխանեց ՛՛Կին ազատամարտիկների միության՛՛ նախագահ, գնդապետ Աիդա Սերոբյանը:
Ասուլիսի բանախոսներից ՛՛Արծիվ մահապարտների միություն՛՛ ՀԿ-ի նախագահ, գեներալ-մայոր Աստվածատուր Պետրոսյանն էլ, շնորհավորելով բոլորին, ասաց. ՛՛Այս սերունդը պիտի զինված լինի ոչ միայն ազգային մշակույթով, այլև՝ հայրենասիրությամբ՛՛:
Դառնալով ասուլիսին ներկա ազատամարտիկներին՝ նա հավելեց. ՛՛Այս մարդիկ յուրաքանչյուր զոհի հետ մեռել-վերածնվել են, իսկ այսօր կռիվ է գնում՝ ո՛ր դարից սկսենք սովորեցնել պատմությունը…՛՛:
Գեներալի խոսքով՝ 19-րդ դարի վերջին-20-ի սկզբին մենք երկու անգամ դիմավորեցինք անկախությունը՝ մեկը Մայիսյան հաղթանակներով, մյուսը՝ 1988-ի ալիքի վրա ազգային արժեքների վերականգնմամբ:
՛՛Մենք զենքով ձեռք բերեցինք անկախություն. ոչ թե սովետական բանակի կազմում գործող հայկական ստորաբաժանումներ, այլ համաժողովրդական բանակ էր պետք՝ անկախության համար՛՛-խոսելով բանակաշինության մասին՝ ասաց Պետրոսյանը:
Աիդա Սերոբյանն էլ հավելեց. ՛՛Ինձ համար անկախությունը սկսվեց այն ժամանակ, երբ ՛՛այո՛՛ ասացինք անկախությանը: Անկախ լինելու համար մենք պետք է ունենանք հզոր բանակ ու հզոր պետություն, հիմա որոշ դժվարություններ կան, սակայն ժամանակի ընթացքում դրանք կհարթվեն: Էլչիբեյը ժամանակին որոշել էր ոտքերը լվանալ Սևանում, սակայն չստացվեց, նույնպես և այսօր Ալիևին ոչինչ չի հաջողվի՛՛:
Ասուլիսին ներկա ազատամարտիկներից Արբակ Խաչատրյանն ասաց, որ անկախությունն աստվածային պարգև է: Նա կոչ արեց հիշել մեր մեծերին, որոնք ընկան անկախության հասնելու ճանապարհին:
Իսկ ազատամարտիկ Ռուբեն Հովսեփյանն էլ հորդորեց սիրել հայրենիքը, որպեսզի կարողանանք պահպանել անկախությունը:
Մանրամասները՝ տեսանյութում.
՛՛Տեսակետ՛՛ մամուլի ակումբում կազմակերպված ասուլիսի աջակից՝ ՛՛Ապավեն՛՛ ընկերություն: