Կա մի հանգամանք, որի մասին ես երկու տարի չէի խոսում՝ կոռեկտությունից ելնելով, բայց հաշվի առնելով Ադրբեջանի նախագահի անհասկանալի պահվածքը՝ կարծում եմ, որ ճիշտ ժամանակն է դրա մասին խոսել: Այս մասին Հանրային հեռուստաընկերությանը տված իր հարցազրույցում ասել է ՀՀ վարչապետ Նիկոլ Փաշինյանը: Հարցազրույցը կայացել է սեպտեմբերի 26-ին՝ մինչ ադրբեջանական լայնածավալ ագրեսիան։
«Կարևոր է մի շատ կարևոր նյուանս բացել, թե ով է իրականում խնդրանքով դիմել Դուշանբեում: Իրականում Ադրբեջանի նախագահն է ինձ դիմել խնդրանքով, և դրա իմաստը եղել է հետևյալը. եթե հիշում եք, այդ շրջանում Երևանի քաղաքապետի ընտրություններ էին, և ես մի շարք ելույթներում անդրադառնում էի Ադրբեջանում տիրող իրավիճակին և փորձում խոսակցություն ծավալել Ադրբեջանի ժողովրդի հետ, և Ալիևի շահագրգռությունը, որ այնտեղ ինչ-որ համաձայնություն կայանա, մի բանի վերաբերյալ էր, որ ինքը ինձ խնդրի, որ ես Ադրբեջանի վերաբերյալ այդ ելույթներից ձեռնպահ մնամ»,-ասել է Նիկոլ Փաշինյանը՝ նշելով, որ Ադրբեջանի ռազմաքաղաքական ղեկավարությունը մտավախություն ուներ, որ այդ ելույթները կարող էին որոշակի քաղաքական պրոցեսներ հրահրել Ադրբեջանում և մտահոգված էր, որ հեղափոխական ալիքը Ադրբեջան կհասնի:
Նա նշեց, որ Ալիևը անձամբ է խնդրել իրեն այդ մասին: Վարչապետն ասաց, որ գոհ է այդպիսի համաձայնությունից, քանի որ Ադրբեջանի ներքին հարցերն իր օրակարգում չէին, և բացի այդ, հայ զինվորների կյանքեր են խնայվել:
Մանրամասները՝ տեսանյութում։