Երկու-երեք տարի է, ինչ ՀՃՈւ հիմնադրամը չէր հրատարակում ՛՛Վարձք՛՛ ամսագիրը՝ ֆինասնական խնդիրների պատճառով: Այսօր արդեն տպագրելու համար անհրաժեշտ գումարը հայթայթվել է, և լույս է տեսել ՛՛Վարձքի՛՛ 13-րդ համարը՝ ամբողջությամբ նվիրված ՀՃՈւ հիմնադրամի ղեկավար, հուշարձանագետ, լուսահոգի Սամվել Կարապետյանի հիշատակին:
Այսօր ՛՛Տեսակետ՛՛ մամուլի ակումբում կայացած ասուլիսը նվիրված էր հենց այս առիթին. այսուհետ ՛՛Վարձքը՛՛ լույս կտեսնի տարեկան երկու անգամ:
Այս մասին ասուլիսի ժամանակ ասաց ՀՃՈւ հիմնադրամի աշխատակից Րաֆֆի Քորթոշյանը: Նա նշեց, որ այս խառնակ օրերին, այնուամենայնիվ, չեն հետաձգել մամուլի ասուլիսը, քանի որ Սամվել Կարապետյանն իր մասնագիտական գործունեության մեծ մասը նվիրել է Արցախ աշխարհին և հենց այստեղից էլ սկսել է իր առաջին քայլերը՝ հուշարձանների ուսումնասիրության գործում:
՛՛Վարձքի՛՛ այս համարում, ըստ Քորթոշյանի, ներառված են հուշեր Կարապետյանի մասին, դրվագներ նրա կյանքի ու գործունեության հետ կապված:
ՀՃՈւ աշխատակիցը պատմեց, թե ինչպես է տարիներ առաջ Սամվել Կարապետյանին մոտեցել մի անծանոթ և ասել. ՛՛Դուք ինձ չեք ճանաչում, բայց 1985 թ. ԵՊՀ-ում ներկայացրել եք լուսանկարներ Արցախից, ինչն էլ հենց պատճառ է դարձել, որ ես ճանաչեմ Արցախը և դառնամ նրա ազատագրության մասնակիցներից մեկը՛՛:
Րաֆֆի Քորթոշյանը նշեց, որ Սամվել Կարապետյանը Խորհրդային Ադրբեջանի տարածքում բազմաթիվ ուսումնասիրություններ է կատարել, երբեմն նաև Խորհրդային Ադրբեջանի ուժային կառույցների կողմից ձերբակալմամբ են ավարտվել նրա արշավները:
՛՛Նա ամրագրում ու փաստագրում էր այդ տարածքները ոչ թե որպես գրավյալ, այլ ազատագրյալ՛՛,-ասաց Քորթոշյանը՝ հավելելով, որ իրենց հիմնադրամն ունի ինչպես հրատարակած, այնպես էլ՝ անտիպ ու արխիվային բազմաթիվ նյութեր, որոնք փաստում են Թուրքիայի ու Ադրբեջանի վանդալական գործողությունների մասին:
Խոսելով հիմնադրամի ապագա ծրագրերի մասին՝ Քորթոշյանն ասաց, որ Կարապետյանը 20-30 հրատարակելիք գրքի ցանկ էր նախապատրաստել: ՛՛Բուն Աղվանքի հայերը՛՛ գիրք էր նախապատրաստում Սամվել Կարապետյանը, նա Կուրի ձախ ափի հայկական հուշարձաններով զբաղվող եզակի մասնագետ էր, բազմաթիվ նյութեր էր հավաքել, մեծ մասը մշակել, այս պահին անտիպ է, երկու հատորանոց գիրք կարող է լինել, առաջին հատորն իր կենդանության օրոք 80 տոկոսով պատրաստ էր արդեն, ՛՛Հայաստանի պատմություն՛՛ գրքաշարի հերթական հատորներից ՛՛Արճեշի՛՛ վրա էր աշխատել, ՛՛Ղարադաղ՛՛ հատորն էր 90 տոկոսով պատրաստ, այս պահին նրա տիկինն է շարունակում այդ աշխատանը, Խնուս գավառն ինձ էր վստահել մոտ կես տարի, այս տարվա վերջ լույս կտեսնի՛՛,-նշեց Քորթոշյանը:
Նա վստահեցրեց նաև, որ դաշտային աշխատանքները շարունակվում են, և իրենք ընդամենը չորս օր առաջ են վերադարձել այնտեղից, որտեղ դաշտային աշխատանքներ են իրականացրել: Քորթոշյանը փակագծեր չբացեց, սակայն նշեց, որ 35 հազար նոր լուսանկարներով են վերադարձել: