Պատերազմական իրավիճակում, անշուշտ, կարևոր է լսել մտավորականության խոսքն ու հորդորը, գնահատականներն ու դիրքորոշումները, ինչն էլ այսօր արվեց ՛՛Տեսակետ՛՛ մամուլի ակումբում կայացած ասուլիսի ժամանակ, որի հյուրերն էին ՀԳՄ նախագահ Էդվարդ Միլիտոնյանը, գեղանկարիչ Հաղթանակ Շահումյանը, «Հայաստանի փոքրիկ երգիչներ» երգչախմբի հիմնադիր Տիգրան Հեքեքյանը և «Հայկազունք» համույթի գեղ. ղեկավար Գուսան Հայկազունը:
՛՛Իմ երգերն են 30 տարի ուժ տվել զինվորներին, իսկ այսօր ես եմ ուժ ստանում մեր զինվորներից՛՛,-ասուլիսի ժամանակ ասաց Գուսան Հայկազունը: Նա հավելեց, որ պատերազմը երկար չի տևելու, ավարտվելու է Ադրբեջանի ջախջախիչ պարտությամբ: ՛՛Մենք միայն Ադրբեջանին չենք հաղթում, մենք մեր հաղթանակով ջարդելու ենք Թուրքիայի ողնաշարը, մեր հետագա հաղթանակներն ենք մոտեցնում՝ Նախիջևանի, Արևմտյան Հայաստանի, գուցե և՝ Կիլիկիայի հետ կապված: Թուրքիան պարտվելու է արցախյան այս պատերազմում՛՛,-նշեց նա:
Տիգրան Հեքեքյանն էլ ասաց, որ ականատես ենք լինում մեր տղաների քաջագործություններին, մեր հրամանատարական կազմի ճկուն գործելակերպին: Նա վստահություն հայտնեց, որ կասկած չկա, որ հաղթում ենք և հաղթելու ենք: ՛՛Սակայն կուզեմ, որ, այնուամենայնիվ, չխոսենք հիմա մեր ոգեշնչվածության մասին, ուզում եմ խոսենք՝ ինչու է մեզ հետ այսպես լինում, 30 տարի ապաշնորհ բոլոր իշխանությունների օրոք չամրացրինք մեր հաղթանակը, կարծում եմ՝ հենց հիմա մեր բանակի խելացի քայլերի շնորհիվ պիտի մտածենք՝ ինչ չենք արել, ինչու չենք արել և հիմա սկսենք արագ շտկել՛՛,-նշեց նա:
Հաղթանակ Շահումյանն էլ կարծում է, որ մենք մեր հույսը չպիտի դնենք հզոր երկրների վրա, նրա խոսքով՝ լավ է, որ դա մեր ժողովուրդն այսօր գիտակցում է: Գեղանկարիչը կարևորեց Սփյուռքի դերը. ՛՛ Այսօր մեր բանակն ու Հայաստանը մեծ կորուստներ ունեն, ամբողջ աշխարհի մեր եղբայրները պիտի դա գիտակցեն և ավելի գործուն լինեն: Մեր բանակը մինչև հիմա չունի մի միավորում, որտեղ մեր Սփյուռքի երիտասարդները ծառայեն՝ թեկուզ մի քանի ամսով, ես կարծում եմ, որ դա շատ կարևոր է, դա ավելի կսերտացնի մեզ միմյանց հետ՛՛:
Էդվարդ Միլիտոնյանն ասաց, որ այսօր մեր ժողովուրդը, Արցախը, Հայաստանը, Սփյուռքը համախմբվում են բանակի շուրջ: ՛՛Երեսուն տարվա մեջ շատ բան չի արվել, բայց բանակաշինություն է եղել, այսօր հո մեր բանակը հենց այնպե՞ս չէ գործում, այստեղ կրթական համակարգն է, ինստիտուտներ, քոլեջներ, մենք անընդհատ տարածել ենք մեր մեջ՝ մենք մենակ ենք և այլն, այդ միտքը մեզ չի հզորացնում, մեր միտքը, միջազգային ասպարեզում մեր հարաբերությունները… Հիշենք, որ տարբեր երկրներ կան, որտեղ մեր տղաները սովորել են, այսօր ատրճանակի կռիվ չէ, այսօր ի հայտ է գալու ժողովրդի կրթվածության, խելքի արգասիքը, հաղթանակ որ ասում ենք, տեսնում ենք հենց ճշգրիտ գործունեության, խելքի պատկերը՛՛:
Մեծապես կարևորելով կրթության դերը՝ նա նշեց. ՛՛Մեզ սառը դատողությունը երբեք չպիտի լքի՝ հատկապես պատերազմական իրադրության մեջ: Կոնստրուկտիվ մտածողություն պիտի լինի տարբեր բնագավառներում: Ռազմահայրենասիրական կրթությունը մեծ դեր ունի՝ այդ երգերը, պարերը, գրականությունը, էլի հասնում ենք մշակույթին, առանց մշակույթի ու կրթության զինվոր չենք ունենա, Նժդեհի գաղափարախոսությունն իզուր չէ, նա մեծ կրթություն էր ստացել՛՛:
ՀԳՄ նախագահի խոսքով՝ դեռ պատերազմի մեջ ենք, սակայն արդեն այսօր շատերը ճիշտ ու սխալ են փնտրում. ՛՛Դեռ պատերազմի մեջ ենք, բայց արդեն ասում են՝ սա սխալ է, նա ճիշտ է, վերջ տվեք փիլիսոփա խաղալուն, լռեք՛՛: ՛՛Առանց այդ էլ շրջապատված ենք թշնամիներով՛՛,-արձագանքեց Հաղթանակ Շահումյանը:
Տիգրան Հեքեքյանն էլ ընդգծեց զինվորների համախմբվածությունն ու կազմակերպվածության բարձր մակարդակը՝ նշելով, որ քաղաքացիական հասարակությունը պիտի սովորի զինվորներից:
Ասուլիսն ավարտվեց Գուսան Հայկազունի հայրենասիրական նոր երգի կատարմամբ. նա նշեց, որ վստահ է, որ իր ՛՛Գետաշեն՛՛ երգը հենց Գետաշենում է կատարելու: