Հոկտեմբերի 15-ին լրանում է Հաճընի ութամսյա հերոսամարտի 100-ամյակը, հերոսամարտ, որի ժամանակ հայ քաջերը՝ տղամարդ, թե կին, ծեր, թե մանուկ՝ բռունցքվել էին՝ պաշտպանելու համար հող հայրենին: 100 տարի և միևնույն ձեռագիրը. այսօր ոչինչ չի փոխվել, թուրքը նույն թուրքն է, եթե ոչ՝ ավելի կատաղած ու մոլեգնած:
1915-ին, դրանից առաջ ու հետո նա մեզ չկարողացավ իսպառ ոչնչացնել, սակայն Մեծ Թուրանի գաղափարից հրաժարվելը Թուրքիայի քաղաքական օրակարգում երբեք չի եղել, ուստի այսօր, 100 և ավելի տարիներ անց, թուրքը կրկին որոշել է իրագործել իր վաղեմի նպատակը՝ վերացնել իր գլխավոր խոչընդոտը՝ հայերիս, պանթուրքական ճանապարհից:
՛՛Հաճըն՛՛ հայրենակցական միության ատենապետ, արմատներով հաճընցի, Հաճընի հերոսամարտի մասնակցի թոռ Հովհաննես Գրիգորյան-Ճարպիկյանը վստահ է, որ այս անգամ ևս թշնամուն չի հաջողվի ի կատար ածել իր ցեղասպանական նկրտումները: Այս մասին Գրիգորյան-Ճարպիկյանն ասաց Tesaket.info-ի հետ զրույցում՝ անդրադառնալով Հաճընի հերոսամարտի 100-ամյակին, որը պատրաստվում էին նշել հանդիսավոր կերպով, սակայն, հասկանալի պատճառով, բոլոր նպատակներն անավարտ մնացին:
՛՛Բնականաբար, այս օրերին հերոսամարտի 100-ամյակը չենք նշում, միայն եկեղեցում պատարագ կմատուցվի՝ ինչպես հաճընցի զոհերի, այնպես էլ՝ այսօր Արցախում զոհված մեր զինվորների ու քաղաքացիական անձանց հոգիների հանգստության համար, նաև ծաղկեպսակ կտեղադրենք Նոր Հաճըն քաղաքի՝ հերոսամարտին նվիրված հուշակոթողի մոտ՛՛,-ասաց Միության ատենապետը:
Նրա խոսքով՝ ՛՛Հաճըն՛՛ հայրենակցական միությունը բազմաթիվ ծրագրեր էր նախատեսել, դրանց թվում էին ականավոր հաճընցիների մասին ֆիլմի պատրաստումը, Կիլիկիո Հաճընի բարբառի մասին գրքի վերահրատարակումը, անցյալ տարի Հաճըն կատարած ուխտագնացության ժամանակ արված լուսանկարների ցուցադրության կազմակերպումը, ինչպես նաև՝ գեղարվեստական մեծ միջոցառում, սակայն, բնականաբար, այս օրերին բոլորիս ուշադրության կենտրոնում առաջնագիծն է:
՛՛100 տարի անց նույն ձեռագիրն է Արցախում, եթե ժամանակին թշնամու գործողությունները պատժվեին, այսօր նույնը չէր կրկնվի՛՛,-ասաց Հովհաննես Գրիգորյան-Ճարպիկյանը՝ ընդգծելով, որ խոսքը միջազգային հանրության և աշխարհի հզորների կողմից պատժելու մասին է, իսկ ինչ վերաբերում է մեր զինվորներին, ապա նրանք, ատենապետի խոսքով, իսկական հերոսներ են: ՛՛Պապերից սերտած դասերը նրանց սրտերում են, կարելի է ասել՝ նույն ոգեղենությունն է այսօր Արցախում, ինչը ժամանակին եղել է Կիլիկիո Հաճընում: Այն ժամանակ էլ թվով բյուր անգամներ իրեն գերազանցող թշնամուն համառորեն դիմակայում էր հայ ժողովուրդը՝ պաշտպանելով սեփական հողում ապրելու և արարելու իրավունքը՛՛,-նշեց մեր զրուցակիցը:
Նա հավելեց, որ Նոր Հաճընում պիտի տեղի ունենար հերոսամարտին նվիրված թանգարանի բացումը: Թանգարանում ներդրվել է ժամանակակից տեխնիկա, որը թույլ է տալիս թանգարանային նմուշներն ու հերոսամարտին առնչվող նյութերը ներկայացնել վիդեո և աուդիո տարբերակներով: ՛՛Այդ ամենն արվել է Հայկ Դեմոյանի, քաղաքապետարանի, Միության աջակցությամբ, գործը հիմնականում արված է, սակայն բացումը, ինչպես նաև՝ մեր նախատեսած միջոցառումները, կհետաձգվեն՛՛,-ասաց Գրիգորյան-Ճարպիկյանը՝ վստահեցնելով, որ պատերազմական իրավիճակի ավարտից հետո ծրագրերը հնարավորության սահմաններում կիրականացվեն:
Զրույցի վերջում մեր զրուցակիցը հավելեց. ՛՛Հաղթելու ենք՛՛: